Г.Баярсайхан: Ногоон бүстээ алт ухуулах эсэхийг ард түмнээсээ асуусан нь дээр
Урт нэртэй хуулийг дагаж мөрдөх журмын тухай хуульд өөрчлөлт оруулах тухай хуулийн төслийг удахгүй Засгийн газар хэлэлцэнэ.
Өөрчлөлтийн гол агуулга нь гол мөрний эх, ойн сан бүхий газарт ашигт малтмал хайх, олборлохыг зөвшөөрөх тухай юм. Өөрөөр хэлбэл ногоон бүс рүүгээ халдах эрхийг олгоно гэсэн үг. Тиймээс тус хуулийн төслийг амьдралд нийцүүлж биш аж ахуйн нэгжүүдэд зориулж гаргаж байна гэж олон нийт эсэргүүцэж байгаа. Хэрвээ голын эхэд олборлох зөвшөөрөл олговол нөхөн сэргээлт хийх боломжгүй. Учир нь голын голдиролыг эргэн сэргээхэд 2000-3000 жил шаардлагатай байдгийг мэргэжлийн хүмүүс хэлдэг. Энэ талаар Байгаль орчин, хүнс, хөдөө аж ахуйн байнгын хорооны дарга Г.Баярсайханаас тодрууллаа.
-“Урт нэртэй” хуулийн төсөл юу болж байна вэ. Ажлын хэсэг ямар үр дүнд хүрсэн бэ?
Би энэ хуулийг батлалцсан гишүүдийн нэг. Хууль УИХ-аар батлагдсан бол мөрдөгдөөд явах ёстой. Хууль богино настай байж болохгүй. Өнгөрсөн хугацаанд энэ хууль үр дүнгээ өгсөн гэж үзэж байгаа. Аль ч намын мөрийн хөтөлбөрийг аваад үзэхэд “Урт нэртэй” хуультай санал агуулга нэг, байгаль орчныг хамгаалах чиглэлээр зүйлүүд байгаа. Жишээ нь, АН-ын мөрийн хөтөлбөрт гол мөрний эхийг хамгаалалтад авна гэсэн заалт байгаа. Шинэчлэлийн Засгийн газрын мөрийн хөтөлбөрт ч энэ агуулга бий. Ер нь “Урт нэртэй” хуулийг цаашид үргэлжлүүлэх амлалттай Засгийн газар шүү дээ. Тиймээс энэ хуулийг цаашид үргэлжлүүлэх нь зүйтэй гэж үзэж байгаа.
-“Урт нэртэй” хуульд өөрчлөлт оруулах гээд байгаа гол зүйл нь гол мөрний эх, урсац газарт хайгуул, олборлолт явуулахыг зөвшөөрөх гээд байгаа. Үүнд та ямар байр суурьтай байгаа вэ?
Аль ч намын мөрийн хөтөлбөрийг аваад үзэхэд “Урт нэртэй” хуультай санал агуулга нэг, байгаль орчныг хамгаалах чиглэлээр зүйлүүд байгаа
-Хуулиа хуучнаар нь хэрэгжүүлээд л явах ёстой. Өөрчлөлт хийх шаардлага байхгүй. Засгийн газрын 194 дүгээр тогтоол ч байгаа. Үүнийгээ ч хэрэгжүүлээд л явах ёстой. УИХ-ын экспертийн албаны хууль зүйн зөвлөмж гарсан. Засгийн газрын оруулж ирсэн хуульд нэгдүгээрт, Үндсэн хуультай зөрчилдөж байгаа. Хоёрдугаарт, хүчин төгөлдөр үйлчилж байгаа бусад хууль тогтоомжтой зөрчилдөх мөн хуулийн төслийн зүйл заалт хороондоо зөрчилдөж байгаа зүйлүүд байна. Иймд Засгийн газар уг хуулиа буцаан татах нь зөв байх.
-Ажлын хэсгийн дүгнэлт хэзээ гарах вэ?
-Ажлын хэсэг гарсан ажиллаж байгаа. Ирэх долоо хоногоос ажлын хэсгийн дүгнэлтийг Байнгын хороонд танилцуулах үүрэг өгнө. Асуудлыг олонхоороо л шийднэ шүү дээ. Гэхдээ ногоон бүс дээр алт ухах уу, үгүй юу гэдгийг ард түмнээсээ асуусан нь дээр дээ.
