Өнгөрсөн долоо хоногийн УИХ-ын чуулган өдөржин хаалттай хуралдаж Хууль зүйн сайд Х.Тэмүүжинг огцруулах эсэх тухай асуудлыг хэлэлцсэн. Чуулганы хуралдаан эхэлсэн цаг үеэс эхлээд шүүх хуралдааны горимоор ажиллаж эхэлсэн гэх мэдээлэл ч байгаа юм. Харин хаалттай хуралдааны нэг онцлог нь Х.Тэмүүжинг огцрох ёстой гэж үзэж байсан гишүүдийн санаа зорилго өөрчлөгдсөн байсан гэсэн яриа гарч байна.

 Тиймээс МАН-ын бүлэг ямар шалтгаанаар завсарлага авсан талаар зарим гишүүдээс тодрууллаа.

С.БЯМБАЦОГТ: МЭДЭЭЛЛҮҮД ХООРОНДОО ЗӨРЖ БАЙСАН

“Цагдаагаас намайг тагнаж шалгасан” гэсэн мэдээллүүд нь хоорондоо зөрж байсан.

-Чуулганы хуралдаанаар Х.Тэмүүжин сайдын асуудлаар оруулж ирж байгаа байнгын хорооны дүгнэлт болон Х.Тэмүүжин сайдын өөрийнх нь хэлсэн “Цагдаагаас намайг тагнаж шалгасан” гэсэн мэдээллүүд нь хоорондоо зөрж байсан. Тиймээс гишүүд шийдвэр гаргахад асуудлыг нарийн судалж эргэлзээтэй байдлаас гарч, өөр өөрийн гэсэн итгэл үнэмшилтэй байх ёстой. Мэдээллийг илүү нухацтай нарийн судлах шаардлага үүссэн учраас завсарлага авсан.

-Бүлгийн хуралдаанаар Х.Тэмүүжин сайдын асуудлаар ярилцав уу?

-Хуралдаанаар ярилцсангүй. Тусгай хяналтын дэд хороонд хугацаатай үүрэг өгч зарим тодорхойгүй асуудлууд дээр холбогдох байгууллагуудаас нь мэдээлэл авч эцэслэн байр сууриа нэгтгэнэ.

 Д.СУМЪЯАБАЗАР: ЗӨВХӨН ҮНЭНИЙГ ОЛОХ ХЭРЭГТЭЙ.

Энэ салбарын сайд их хариуцлагатай хүн байх ёстой.

-Хууль хяналтын байгууллагуудын ярьж байгаа мэдээллийн зөрүүтэй байдлаас болоод тодруулах зүйл их байгаа юм. Ер нь Хууль зүйн сайд байна гэдэг хамгийн их ёс зүйтэй, хариуцлагатай албан тушаал. Засгийн газрын бүх л хэлэлцэж, ярилцаж байгаа асуудлуудын ихэнх нь хууль байгаа учраас энэ салбарын сайд их хариуцлагатай хүн байх ёстой. Тиймээс хууль хяналтын байгууллага цагдаа, прокуроруудын ярьж байгаа мэдээллүүд зөрөөд байгаа учраас үнэнийг мэдэхийг хүсч байна. Бид зөвхөн үнэнийг олох хэрэгтэй. Ямар нэгэн байдлаар буруу мэдээллээс болоод Хууль зүйн сайд гэсэн хариуцлагатай албан тушаал болон хувь хүн Х.Тэмүүжинтэй андуу байдал гаргахаас болгоомжилж байна. Мөн үнэхээр хууль зөрчсөн байвал яах вэ. Энэ бүхнээс үүдээд тодруулах судлах зүйл их байгаа юм.

 Я.СОДБААТАР: ТОДОРХОЙГҮЙ АСУУДЛУУДААР МЭДЭЭЛЭЛ АВЧ БАЙР СУУРИА НЭГТГЭНЭ.

Хууль хүчний байгууллагуудын мэдээллээс үүдээд дахин судалж тодруулах зүйл байна.

-Хууль хүчний байгууллагуудын мэдээллээс үүдээд дахин судалж тодруулах зүйл байна. Өмнөх чуулганы үед Х.Тэмүүжин сайдын асуудлаар хаалттай хуралдааны үеэр хэлэлцье гэж байсан бол энэ удаа тусгай хяналтын дэд хороонд ордог гишүүдээсээ мэдээлэл авч байж тодруулах зүйл байна. Тэгж байж байр сууриа нэгтгэнэ.