УИХ дахь бие даагч гишүүдийн зөвлөлөөс өнөөдөр мэдээлэл хийлээ. Тэд энэ долоо хоногт УИХ-ын байнгын хороо, чуулганы хуралдаанаар хэлэлцэх асуудлын талаар байр сууриа илэрхийлсэн.

Тухайлбал, Газрын тосны хуулийг өмнө нь унагасан  ч дахин өргөн барьсан. Гэтэл шинэ хууль нь гэрээнүүдэд өөрчлөлт оруулахгүй, бүтээгдэхүүн хуваах гэрээний асуудлыг тоо тавихгүйгээр Засгийн газар шийднэ гэсэн нь буруу гэдийг шүүмжиллээ. Мөн Нягтлан бодох бүртгэлийн хууль, Хүүхэд харах үйлчилгээний хуулиудыг онцлон ярьлаа.

Мөн бие даагчдын зөвлөлөөс санаачлан "Шударга ёс" эвслийн бүлгийн гишүүд, АН-ын гишүүдээс бүрдсэн албан бус бүлэг байгуулахаар болсон гэлээ. Тодруулбал, "Шударга ёс" эвслийн бүлгээс дөрөв, АН-аас хэд хэдэн гишүүд албан бус бүлэгт нэгдэхээ илэрхийлээд байгаа аж.

Одоогоор 10 гишүүн албан бус бүлэгт нэгдэхээ илэрхийлээд байгаа бөгөөд цаашид олон болно гэж С.Ганбаатар гишүүн хэллээ. Албан бус бүлэг нь тодорхой 3-4 асуудлыг сонгон авч, тэр асуудлаа шийдвэрлэхийн тулд үзэл бодол, саналаа нэгтгэх хэсэг бүлэг юм. УИХ-ын эмэгтэй гишүүдийн албан бус бүлэг үйл ажиллагаа явуулж байгаа.

Тухайн албан бус бүлгийн гишүүд нь өөрсдийн намын бүлэгтээ харьяалагдах бөгөөд гагцхүү албан бус бүлгийнхээ үйл ажиллагаанд давхар оролцох юм байна.

Албан бус бүлгийн асуудлаар сүүлийн нэг сарын хугацаанд ярилцсан бөгөөд албан бус бүлэг ард иргэдийнхээ эрх ашгийн төлөө уул уурхай, эрүүл мэнд гэсэн тодорхой сэдвүүдээр санаа нэгдэж ажиллах юм байна. Албан бус бүлэг байгуулах ажлаа энэ долоо хоногтоо албажуулж ажиллахаа бие даагчдын зөвлөлөөс мэдэгдлээ.