УИХ-ын Хууль зүйн байнгын хороо Гэр бүлийн хүчирхийлэлтэй тэмцэх тухай хуулийн шинэчилсэн найруулгын төслийн хэлэлцэх эсэхийг хэлэлцээд дэмжив.

Хуулийн төслийг хэлэлцүүлэгт бэлтгэхдээ өөрчлөх шаардлага байгаа учир С.Баярцогт гишүүнээр ахлуулсан ажлын хэсэг байгуулав. Ажлын хэсэгт Ж.Батзандан Д.Лүндээжанцан болон эмэгтэй гишүүд орлоо.

Хуулийн төслийг Засгийн газар санаачлан боловсруулсан тул Хууль зүйн сайд Х.Тэмүүжин гишүүдийн асуултад хариулав.

Д.Лүндээжанцан: -Гэр бүлийн дотоод асуудлыг хуулиар зохицуулах боломжгүй ч уламжлалт хүмүүжил, шашин шүтлэгээр зохицуулах ёстой. Сүүлийн үед бид уншихад ч аймшигтай хэргүүд гарч байна. Хуульд олон шинэ зүйл байгаа ч хохирогчдыг хоргодуулах байр нууц байх нь чухал шүү?

Х.Тэмүүжин: -Хайртай хүндээ халддаг асуудал гэр бүл дотор байгаа учир хуульчлахаас өөр аргагүй. Ингэхдээ урт хугацааны боловсролоор, зохицуулах шаардлага бий. Ер нь хүчирхийлэл танихгүй хүмүүс биш гэр бүл, садан төрөл дотор 70-80 хувийг эзэлдэг. Тэгэхээр энэ хэргийг ил гаргахад хүндрэлтэй байдаг. Гэрч, хохирогчдыг хамгаалах байрыг өдий хүртэл төр нуруун дээрээ авч ирсэн.

Ж.Батзандан:-Бид заавал АНУ, европуудыг дууриах албагүй. Гэр бүлийн суурь үнэ цэнээ бодох ёстой. Бидний үед аав нь алганы амт үзүүлдэг л байсан. Тэглээ гээд хохироогүй өдийг хүрсэн биз дээ?

Х.Тэмүүжин: -Уламжлалт гэр бүлийн онцлог улс бүрт бий. Тэглээ гээд өөгшүүлж болохгүй. Өмнө нь гэр бүл дотор хүндрэлтэй асуудал үүсч байгаагүй. Харин одоогийн нөхцөл байдал өөр болсон.

Ж.Батзандан: -Монголчуудын уламжлалт гэр бүлийн харьцаа хүйтэн болжээ. Энэ байдлыг жамаар нь бус хуулиар зохицуулах ёстой гэж үү. Хуульчиллаа гээд гэр бүлийн хүйтэн харьцаа халуун болох уу?

Х.Тэмүүжин: -Зөвхөн аав, ээж биш хамаатан садан, ах дүү гээд монголчууд бид том гэр бүлтэй. Хамаатныхаа хүүхдийг амбаарт хоридог, хадам ээжийнхээ тэтгэврийг авчихаад хоол өгдөггүй гэх мэт бодит зүйл олон бий. Ийм зүйл амьдралд байгаа учраас хуулиар зохицуулах шаардлагатай.