Монгол хэлний тухай хуулийн төслийг УИХ-аар хэлэлцэж эхэллээ. Тус хуулийн төсөлд иргэний үнэмлэх, төрсний гэрчилгээ болон бусад баримт бичиг, компанийн логог заавал монгол бичгээр бичихээр тусгажээ.

Мөн гудамж талбай, зар сурталчилгааны самбарыг монгол бичгээр бичих ёстой ажээ.

УИХ-ын гишүүн, Монгол хэлний тухай хуулийн төслийг санаачлагч Д.Батчимэг:

Хуулинд монгол бичгийн хэрэглээг дэлгэрүүлэхтэй холбоотой заалтууд орсон байгаа. Монгол бичгийг дунд сургуульд зааж байгаа ч төсөлд зургадугаар ангиас эхлэн заана гэж хуульчилсан. Түүнчлэн их дээд сургууль төгсөгчид, төрийн албаны шалгалт өгөгчдөөс монгол хэлний түвшин тогтоох шалгалтыг авдаг болно.

УИХ-ын гишүүн, БШУ-ны сайд асан Ё.Отгонбаяр:

Дээд боловсролын үнэмлэхийг монгол бичгээр бичихэд алдаа гарч байсан. Тухайлбал олон мэргэжил гадаад хэллэгээр байгаа учраас алдаа гарсан. Үүнийг анхаарах хэрэгтэй.

УИХ-ын дэд дарга, Монгол ардын намын дарга М.Энхболд хэлэхдээ монгол бичигтэй холбоотойгоор хэдий хэмжээтэй зардал гарах вэ гэдгийг асуусан юм. Харин ажлын хэсгийн зүгээс нэг их зардал гарахгүй гэдгийг хэлэв. Тус хуулийг байнгын хорооны хурлаад дэмжин УИХ-аар хэлэлцүүлэхээр боллоо.