Хэнтий аймгийн төв Чингис хотод их бүтээн байгуулалтын ажил өрнөж байгаатай холбогдуулан “Юна”, “Жижиг эрдэнэ”, “Элбэг баян говь” компаниуд бетон зуурмагийн үйлдвэр угсарч, өчигдөр “Жижиг эрдэнэ” компанийн үйлдвэр нээлтээ хийлээ.

Тус компани JS-1000 маркийн бетон зуурмагийн үйлдвэрийг 5 сарын хугацаанд угсарч үйл ажиллагаагаа ийнхүү эхэлж байна.

Эл үйлдвэрээс М100-М350 маркийн бетон зуурмаг гаргана

Эл үйлдвэрээс М100-М350 маркийн бетон зуурмаг гарах бөгөөд нэг шоометр зуурмаг 142-182 мянган төгрөгийн үнэтэй байх ба бүх маркийн бетон зуурмагтаа уян налархайжуулагч, бат бэхийг нэмэгдүүлэх үйлчилгээтэй химийн нэмэлтийг байнга хэрэглэж үйлдвэрлэн барилгын компаниуд хэрэглэгчдийг хангах ажээ.

“Жижиг эрдэнэ” ХХК-ий ерөнхий захирал Г.Болор ярихдаа, “Манай үйлдвэр барилгын компаниудын ажлыг хөнгөвчилсөн хөрөнгө мөнгө цаг хугацааг хэмнэсэн, бүтээн байгуулалтын ажлын гол үндэс суурь болсон чухал ачхолбогдолтой бөгөөд хоногт 1200 м³ бетон зуурмаг үйлдвэрлэх хүчин чадалтай. Цаашдаа бид төмөр бетон хийцийн үйлдвэр байгуулах ба төрөл бүрийн блок үйлдвэрлэхээр төлөвлөж байгаа” гэлээ. Бетон зуурмагийн үйлдвэрт орон нутгаас 30 гаруй хүн ажлын байраар хангагджээ.

Бэлэн бетон зуурмагийн үйлдвэр ашиглалтад орлоо