Эрүүл мэндийн сайд Удвал АНУ-ын Техас мужийн “Нярайн тандалт шинжилгээний төв”-ийн захирал Brad Therrell, Филиппин улсын “Нярайн тандалт шинжилгээний төв”-ийн захирал Carmencita D Padilla нарыг өчигдөр(2014.06.25) хүлээн авч уулзлаа.

Тэд энэ сарын 24-26-ны өдрүүдэд Улаанбаатар хотноо зохиогдож байгаа “Нярайн тандалт шинжилгээний багийн чадамжийг бэхжүүлэх нь” сэдэвт уулзалт-семинарт оролцохоор ирсэн байна.

Манай улс “Нярайн тандалт шинжилгээний хөтөлбөр”-ийг 2014-2020 онд улс орон даяар хэрэгжүүлэхээр болсон бөгөөд Эрүүл мэндийн сайдын тушаал гарч, хөтөлбөрийн нээлтийг өнгөрсөн сарын 30-ны өдөр хийсэн билээ.

Тус хөтөлбөр нь Монгол улсын Засгийн газрын бүтээлч арван ажлын нэг бөгөөд нярай хүүхдэд түнхний үеийн төрөлхийн мултрал ба дутуу хөгжил, бодисын солилцооны төрөлхийн зарим эмгэг, сонсголын төрөлхийн бэрхшээл, дутуу нярайн нүдний торлог бүрхүүлийн эмгэгийг эрт илрүүлэхэд гол анхаарлаа чиглүүлж ажиллах юм. Энэхүү хөтөлбөрийг хэрэгжүүлэхэд ЭХЭМҮТ, АШУҮИС зэрэг байгууллага голлон оролцох бөгөөд хөтөлбөр хэрэгжсэнээр нярайн эндэгдлийг бууруулах, хөгжлийн зарим бэрхшээлээс сэргийлэх боломж бүрдэх юм.

Нярайн тандалт шинжилгээний асуудлаар ярилцлаа