УИХ-ын гишүүн Х.Тэмүүжин, Ж.Сүхбаатар, Ж.Энхбаяр нар өчигдөр Авлигатай тэмцэх газар очив. Тэднийг Авлигатай тэмцэх газрын дарга Ч.Сангарагчаа дэд дарга, хэлтсийн дарга нарын_; хаа хамт хүлээн авч уулзав. Х.Тэмүүжин гишүүн ирсэн хэрэг зорилгоо тайлбарлалаа. Тэрбээр "Монголд авлига гэдэг үзэгдэл өөрөө газар авчихсан. Гэтэл үүний эсрэг тэмцэж байгаа үйл ажиллагаа "Хангалтгүй, эргэлзээтэй, хасах үнэлгээтэй байна" гэсэн зүйлүүд яригдаад байна. Гэхдээ авлигын эсрэг энгийн арга хэрэгслээр тэмцээд хүчрэхгүй байгаа хандлага харагдаж байна.

Тиймээс УИХ-ын Хууль зүйн байнгын хороо, Хүний эрхийн дэд хороонд байдаг хуульч мэргэжилтэй залуу гишүүд ярилцаад "Авлигатай тэмцэх үйл ажиллагааг дэмжих бүлгийг УИХ-д байгуулъя", Авлигатай тэмцэх газар, УИХ хоорондын уялдаа холбоог сайжруулж, уг байгууллагыг дэмжье гэдэг дээр санал нэгдсэн. Мөн жил бүрийн дөрөвдүгээр сард Авлигатай тэмцэх газартай хамтран нээлттэй сонсгол зохион байгуулъя гэсэн юм. Энэ удаад хөрөнгө орлогын мэдүүлгийг авч байгаа байдал, гарч байгаа зөрчил, хариуцлагын талаар ил тод сонсгоё гэж байгаа. Өмнө нь хөрөнгө орлогын мэдүүлгийн талаар үнэлэлт дүгнэлтийг зөвхөн Авлигатай тэмцэх газрынхан өөрсдөө яриад сонин хэвлэлээр гаргадаг. Тэр нь нийгэмд хов жив маягаар цацагддаг.

Хөрөнгө орлогын мэдүүлгээ өгөөгүй, эсвэл худлаа, дутуу өгсөн албан тушаалтнуудад хариуцлага тооцож байгаа байдал нь цаасан дээрх бичиг төдий болоод үлдээд байна. Тиймээс нээлттэй сонсгол хийж хөрөнгө орлогоо өгөөгүй албан тушаалтныг дуудаж, тэдэнд харицлага тооцох ёстой албаны хүмүүсийг авчирч аль алиныг нь нээлттэй сонсох шаардлагатай байна" гэв.

Тэгтэл Ж.Сүхбаатар гишүүн Авлигатай тэмцэх газрын ажилд хөндлөнгөөс оролцох гэсэнгүй, бодлогын талаас нь дэмжлэг үзүүлнэ гэдгээ хэллээ. Ж.Энхбаяр гишүүн олон улсын хэмжээнд авлигын эсрэг яаж тэмцэж байгааг судалсны үндсэн дээр УИХ-д бүлэг байгуулснаа тайлбарлан үүнд УИХ-ын экс гишүүд нэгдэж болохыг дуулгасан юм. Үүний дараа Ч.Сангарагчаа дарга хариу үг хэлсэн юм. Түүний хэлсэн бүхний дийлэнх нь "Авлигатай тэмцэх газар байгуулагдсан цагаасаа хойш гүтгэлэг доромжлолын дунд үйл ажиллагаагаа явуулж ирлээ. Бид маш их саад бэрхшээлтэй гулгарч байна.

Монголд авлигатай тэмцэх үйл хэргийг эхлүүлэхэд хэцүү байлаа. Төр засгийн зүгээс авлигатай тэмцэх хүчтэй хүсэл зориг хангалтгүй байна. Бодит ажил хийхгүй мөртөө авлигатай тэмцэнэ, шударга ёсыг тогтооно гэж их ярихаас цаашгүй албан тушаалтан олон байна" гэдэг үг байлаа. Цааш нь ярихдаа "Гэхдээ бид энэ хэцүү давааг давсаар ирлээ. Давах ч болно.

Үүнийг олон жилийн өмнөхтэй харьцуулахад Maш том амжилт юм шүү. Ингээд Авлигатай тэмцэх газрын галт тэрэг замдаа ороод саадгүй явж байна" гэлээ. Төгсгөлд нь ирсэн гурван гишүүнийг магтав. "Авлигын эсрэг байгууллагыг парламентын дэргэд байгуулж байгаад баяртай байна. Бидний хүсэн хүлээж байсан хүлээлтийг та нар биелүүллээ.

Өнөөдрийг хүртэл манай байгууллагатай албан ёсны ажил ярьж амтрахаар ирж буй албан тушаалтнууд та гурав гээд хэлчихэд хилсдэхгүй" хэмээв. Үүний дараа УИХ-ын гишүүн Х.Тэмүүжин "энэ сарын 24, 25-наар нээлттэй сонсгол хийхэд Авлигатай тэмцэх газар бэлэн үү" гэхэд цөмөөрөө "бэлэн бэлэн" гэж хариулж байлаа. Авлигатай тэмцэх хуульд өөрчлөлт оруулж, эрх зүйн орчныг сайжруулаагүй цагт хөрөнгө орлогын мэдүүлгээ өгөөгүй, худлаа, дутуу  өгсөн хүмүүст хариуцлага тооцох  тогтолцоо дээрдэхгүй гэдгийг хаа  хаанаа анхаарахыг Авлигатай  тэмцэх газрынхан хэлж байв. Ж.Сүхбаатар гишүүн "Төрийн өндөр албан тушаалтан өөрийн хөрөнгөө төрөл садангийнхаа хүний нэр дээр шилжүүлчихдэг. Энэ тохиолдолд тэдний хамаатан садангийн хүмүүсээс хөрөнгө орлогын мэдүүлэг авах боломж бий юу" гэдгийг лавлаж байв. Гэвч эрх зүйн орчин өөрчлөгдөөгүй цагт ийм боломж байхгүй гэсэн хариулт авч байлаа. Энэ уулзалтаар нээлттэй сонсгол зохион байгуулах өдрийг товлосонгүй. Дахин ярихаар тохироод тарав.