Тэдний намтраас үүнийг мэдэж болно. МАХН-ын залуу улстөрчид элдэв бүлэглэлд хуваагдлаа гэж дуулддаггүй ч тэтгэврийн насанд дөхсөн ах нарыгаа шахаж эхэлсэн нь нууц биш. АН-ынхан хэдийнэ хэд хэдэн фракц, клубт харьяалагдаж буй.

Энэ Парламентад 1970 оноос хойш төрсөн есөн гишүүн бий. Тэдний отгон нь болох зургаан залуу улстөрчийг энэ удаа онцольё. Гэхдээ МАХН, АН тус бүрээс гурвыг "шигшлээ".

2008-2012 оны УИХ-ыг өнгөөр будвал 70-аад оны залуу улстөрчид тодоос тод ялгарна. Анхны УИХ буюу 1996 оны Парламентад хорин хэдтэй С.Баярцогт, Ч.Сайханбилэг нар залуусын дуу хоолой болж явсан. УИХ өнөөдрийнх шиг залуусаар "хахаж" байсангүй. Яах аргагүй л Монголын хүн амын 70 илүү хувийг эзэлдэг залуус өөрсдийн төлөөлөлд харамгүй санал өгчээ.

Ажиглаж байхад МАХН залуусаа бодлогоор дэмждэг бол АН-ын цөс ихтэй залуус тэмцэл, тэмүүллээрээ гал, усан дундуур туучсаар их улс төрд өөрсдийн орон зай, нэр нөлөөг байлдан олж авдаг. МАХН-ын залуус улс төрд орохоос урьд төрийн хийгээд улс төрийн тодорхой албан тушаал хашиж иржээ. МАХН тэднийгээ "за боллоо" гэсэн үедээ улс төрийн ачаа үүрүүлдэг нь анзаарагддаг. Л.Гантөмөрийг эс тооцвол УИХ дахь АН-ын далаад оныхон харин нэг харайлтаар шахам орж иржээ.

Ж.ЭНХБАЯР. 37-той. Бэлтгэгдсэн боловсон хүчний нэг. Хуульч, эрх зүйч. Нам доторх бие даагчдын төлөөлөл болдог. Залуу хүн гэхэд асуудалд ихэд буурь зааж хандах юм билээ. Гаалийн байгууллагад газрын даргаас хөдөлмөрийн гараагаа эхэлж, МХЕГ-ын газрын дэд даргаар ажиллаж байлаа. 1990-ээд оны сүүлээр улс төрд орж ирсэн. Тэр үедээ Баганбандийн хүн гэгдэж байв. Гадаадын хөрөнгө оруулалтын газрын дарга Б.Ганзориг, УИХ-ын гишүүн Ц.Дашдоржийн зөвлөх Мөнхбилэг нартай хамт "Шинэ зуун" төв байгуулж, нам дотроо улс төрийн үйл ажиллагаа явуулж байв.

1990-ээд оны сүүлээр МАХН-ын залуус Энхбаярын, Багабан-дийн гэж талцаж байхад МАХН-ын генсек У.Хүрэлсүхийн эсрэг зогсож байсан гол дүрийн нэг. Сүүлд тэд нэгджээ. "Шинэ зуун" төв татан буугдаж, Хүрэлсүхийг МАСЗХ-ны ерөнхийлөгчөөр ажиллаж байхад дэд тэргүүн нь байв. Зүүний хүчний холбооноос хөндий байдаг шиг харагддаг.

УИХ дахь 70-аад оныхон