-Өвгөн партизануудын эртний арга аа гэж-

Хаалга савж, гарсан өдрөөсөө эхлэн үргэлж нэг нүдээрээ шагайж харна гэдгээ илэрхийлсэн АН-ынхан Ж.Энхбаяраар туг тахихаар шийдвэрлээд байна. Хамтарсан Засгийн газрын үед Д.Зоригтыг золигт гаргахын төлөө "хайртай, хайргүй, хайртай..." хэмээн дотроо тэмцэлдэн, нэг сайдын асуудлыг гурвантаа өргөн барьж байсан  цэнхэр булангийнхан байгаа өөрчилсөн нь энэ. Памперстай гишүүдээр "тахил өргөх" хоббитой тэд эхний алхмаа хэдийнэ хийсэн. Тэрдундаа ардчиллын партизанууд шинэхэн сайдыг суудлаас нь түлхэхээр шийдвэрлэв.  Батлан хамгаалахын сайд Ж.Энхбаярыг огцруулах тухай УИХ-ын тогтоолын төслийг УИХ-ын гишүүн Р.Гончигдорж, Э.Бат-Үүл нар УИХ-ын дэд дарга Г.Батхүүд өргөн мэдүүллээ.

Эл асуудлыг чуулган завсарлахаас өмнө өргөн барина гэдгээ амаар хэлж байсан ч бичгээр ажил хэрэг болголгүй байсаар саарал ордонд үлдсэн угшил нэгт дэд даргадаа өргөн барьсан нь энэ. Хоёр партизаны тайлбараар "Батлан хамгаалахын сайд Ж.Энхбаяр Нь Улаанбаатар хотод ойрхон байрлалтай цэргийн ангиудыг дахин тоноглон тусгайлан бэлдэж бэлэн байдалд оруулах саналыг Батлан хамгаалахын сайдын зөвлөлийн хуралдаанаар оруулсан байна. Хэвлэл мэдээлэлд үүнийгээ "... зэвсэгт хүчний гол үүрэг байлдааны бэлэн байдалд байх явдал" гээд "Долдугаар сарын 1-нд болсон үйл явдлаас.сургамж авсан. Ийм хэлбэрийн онц байдал зарласан... үед Батлан хамгаалах салбар бэлэн байдалд байх ёстой" гэж тайлбарласан байна. Батлан хамгаалахын сайд Ж.Энхбаярын энэ үйлдэл нь Үндсэн хуулийн 11.2-т "Монгол Улс өөрийгөө хамгаалах зэвсэгт хүчинтэй байна" гэж заасныг ноцтой зөрчиж байна" гэжээ. Мөн иргэдийнхээ эсрэг зэвсэгт хүчнийг байлдааны бэлэн байдалд оруулахаар бэлтгэж байгаа нь Батлан хамгаалах тухай хуулийн 3.2 дахь хэсгийг зөрчсөн үйлдэл хэмээн тодотгосон байлаа. Улмаар асуудлыг яаравчлан ээлжит бус чуулганаар сайдыг авч хэлэлцэнэ гэдгээ илэрхийлээд буй.

Бурал партизануудын энэхүү үйлдэл өөрийг нь эзгүйчилсэн талаар Батлан хамгаалахын сайд Ж.Энхбаяр, генералуудын хамт мэдээлэл хийсэн билээ. Түүний өнөөгийн хэлж ярьж байгаа бүхэн Л.Болдын хийж, эхлүүлсэн ажлын үргэлжлэл гэдгийг ч тодотгосон. Түүнчлэн өвгөн партизануудад асуудлыг ойлгуулахыг хичээсэн ч өөрсдөө хүсээгүй гэж байгаа. Тэгэхээр их сунгааны өмнөх өвгөн ах нарын дүүгээ "дүүжлэх" уран мэх энэ бололтой. Гэвч бусдын толгой дээрх өвсийг авах гэж байж, өөрийн толгой дээрх бухлыг бусдад өгөөш болгож мэдэх байдал бий болж мэдэх нь. Эхэндээ халаа сэлгээгээр нь буруутгаж байсан АН-ынханд дээрх байдал аргагүй л шалтаг, шалтгаан болсон. Учир нь хамтарч ажиллая гэхээр хаалга саваад гарсан нөхрийг өмнөө бариад сайдыг суудлаас нь унагана гээд гүйхээр арай л жулдаад байсан хэрэг. Харин нууцын зэрэглэлтэй асуудлыг ил гаргаж, улмаар Л.Болдын санаачилгыг тодотгосон нь цучлыг гал болгов.

Мэргэн буучдын хоёр ротыг бэлтгэж байгаа мэдээлэл зөвхөн нууцын зэрэглэлд хамаарах учиртайг өмнөх болоод одоогийн сайдын хэн хэн нь хэлж байгаа ч уснаас хуурай гарахын тулд дэлгэхээс өөр арга байсангүй. Улсын нууц задруулсан хүн хуультай гэдгийг ч тэд амандаа бувтнаж байсан ч бас л зөрчих нь тэр. Мэдээж, гурван жил Батлан хамгаалахын салбарыг толгойлсон хүний хувьд Л.Болдын үг Ж.Энхбаярыг номхотгоход юухан байх билээ. Үгийнхээ завсар сонгууль эхэлсэн гэдгийг анхааруулж, миний биш тэрний буруу гэдгийг ч ойлгуулсан. Нөгөөтэйгүүр, онц байдал гэхээр л долдугаар сарын 1-нээр төсөөлөх болсон монголчуудыг Ж.Энхбаярын үйлдэл дээр дөрөөлж, өөртөө татах гэсэн уран ухааны цаад учрыг яахан орхиж болох билээ. Санаанд илхэн буух энэ өдрийг хүн бүр хүсэхгүй байгаа. Дахин битгий давтагдаасай гэсэндээ амандаа маань уншиж суухад улс төрийн хүрээнд энэ л өдрөөр шоудаж, дахин турхирах гэсэн егөөдлөг, хардлага оршсоор...

Өнөөдөр уул уурхайгаар шантаажилж Д.Зоригтыг биш долдугаар сарын 1-н дээр дөрөөлж Ж.Энхбаярыг өшиглөх гол тактик явагдаж буй нь энэ. Нэгэнт л сонгууль хаяанд ирлээ, өөр өөрийн булангаас халз тулья гэдгээ илэрхийлсэн 20 настай АН-ынхны холч ухаан биш гэж үү. Ж.Энхбаяр "Би буруугүй" гэж мянга хашгирч, өвгөн ах нартаа олонтаа тайлбарласан ч тэд сонгуулийн маргааш л сонсож, түүний бодол Л.Болдынхтой адил байж хэмээн ухаарах болов уу.