Манай улсад Амны хөндийн эрүүл мэндийн  төслийг хэрэгжүүлэх, энэ хүрээнд Амны хөндийн эрүүл мэндийн төв болон эрүүл мэндийн мэдээллийн санг байгуулах ажлыг хэрэгжүүлэхээр ирээд буй Тайваны ротарын  гишүүдийг УИХ-ын гишүүн, Байгаль орчин, хүнс, хөдөө аж ахуйн байнгын хорооны дарга Г.Баярсайхан, УИХ-ын гишүүн, Хууль зүйн байнгын хорооны дарга Д.Ганбат нар хүлээн авч уулзлаа.

Уулзалтын эхэнд УИХ-ын гишүүн Г.Баярсайхан “Тайваны ротарийн гишүүдтэй уулзаж байгаадаа таатай байна. Та бүхэн Монголын хүн амын эрүүл мэндийн төлөө маш их буяны үйл ажиллагаа явуулж буйд баяртай байдаг. Миний бие Тайван улсад албан ёсны айлчлал хийж байсан.

Танай орны тухай мэднэ. Найрсаг харилцаатай, нөхөрсөг тусч хүмүүс байдаг. Чингэлтэй дүүргийн Эрүүл мэндийн хоёрдугаар төвд шүдний үзлэгийн иж бүрэн зөөврийн бор машиныг олгож буйд тус эмнэлгийнхэн надаар дамжуулж та бүхэнд талархаж буйгаа илэрхийлсэн. Хол газраас бидний хүүхдийн эрүүл мэндэд анхаарал тавьж байдагт та нарт сайн сайхныг хүсэн ерөөе” гэв.

Бид Монголынхоо Ротарийн гишүүдтэй хамтран эрүүл мэндийн салбарт дэмжлэг үзүүлж ажиллах боломжтой

Олон улсын Ротарийн 3490 дүгээр дүүргийн захирагч Horng Ching Huei  “Манай байгууллага нь нэг сая гаруй гишүүнийг эгнээндээ нэгтгэсэн. Бид Монголынхоо Ротарийн гишүүдтэй хамтран эрүүл мэндийн салбарт дэмжлэг үзүүлж ажиллах боломжтой гэж харж байна.

Улаанбаатар Ротарын 20 жилийн ойн арга хэмжээ ирэх 2015 онд болно. Эрхэм гишүүд та бүхэнийг энэ ойн арга хэмжээнд хүрэлцэн ирэхийг хүсч байна” гэсэн юм. Байнгын хороодын дарга нарыг хүлээн авч уулзсанд Тайваны ротарын төлөөлөгчид талархал илэрхийлэв.