УИХ-ын чуулганы хуралдаанаар Эрчим хүчний сайдад Д.Зоригтыг томилохыг дэмжлээ.

Гишүүд хэлэлцүүлгийн явцад эрчим хүчний салбар дахь шинэчлэлийг үргэлжлүүлэхийг санууллаа. Мөн энэ салбарыг зах зээлийн зарчимд шилжүүлж, үнэ тарифын оновчтой бодлого хэрэгжүүлэх хэрэгтэй гэсэн юм.

Түүнчлэн өнөөг хүртэл зарим сумын төвүүд эрчим хүчинд холбогдоогүй байгаа нь маш том асуудал гэдгийг онцолсон. Сүүлийн хоёр жилд эрчим хүчний салбарт маш олон шинэчлэлүүд хийгдсэн, өмнөх сайд М.Сономпил сайн ажилласан гэж байна.

Мөн эрчим хүчний салбарын шинэчлэлийг хэрэгжүүлэх талаар 2012 онд гарсан УИХ-ын 72 дугаар тогтоолыг хэрэгжүүлэх ёстой гэлээ. Уг тогтоолд эрчим хүчний үнийг үе шаттайгаар чөлөөлж, зах зээлийн эдийн засагт шилжүүлэх тухай асуудлыг тусгасан байдаг.

Д.Ганбат: Манайх Уран, нүүрс, сэргээгдэх эрчим хүчний хувьд асар их нөөцтэй ажиллаж болох улс.

Өнөөдөр хөдөө орон нутгийн их нүүдлийг багасгахын тулд аймгууд дээр анхаарах цаг болсон. Өмнөх засгийн газар дулааны станцуудыг аймгууд дээр баръя гэж гэрээгээр ажиллах гэж оролдсон. Энэ нэг л бүтээгүй. Үүн дээр та ямар бодолтой байна вэ? Манайх Уран, нүүрс, сэргээгдэх эрчим хүчний хувьд асар их нөөцтэй ажиллаж болох улс. Гэтэл бидний ургашгүйгээс болоод оюутолгой хятадаас цахилгаан авч байна. Баруун аймгууд ОХУ-аас цахилгаан авч байна. Үүнд дээр анхаарч ажиллаарай.

Я.Содбаатар: Эрчим хүчний шинэ эх үүсвэрүүд бий болгох дээр таныг анхаараасай гэж хүсэж байна

Манай туршлагатай эдийн засагч энэ салбар дээр очиж байгаа юм байна. Дотоодын эрчим хүчний хэрэглээгээ хангах асуудал чухал байгаа. Монгол улсын эрчим хүчний хэрэглээ жилдээ 7-10 хувь өсөж байгаа. 2030 онд хэрэглээ 3 дахин өснө гэсэн судалгааны дүн байдаг. Тиймээс эрчим хүчний шинэ эх үүсвэрүүд бий болгох дээр таныг анхаараасай гэж хүсэж байна. Манай олон аж ахуй нэгж дээр шинэ эх үүсвэрүүд бий болгох чиглэлээр төслүүд бий болсон. Гол гацаа нь тарифын бодлогын асуудалд байгаа. Олон улсын жишигт нь нийцүүлэхгүй бол хөрөнгө оруулалт орж ирэхгүй. Үүнийг анхаараарай.

Д.Зоригтыг Эрчим хүчний сайдаар томиллоо