Ардчилсан намын дарга З.Энхболд, Ерөнхий нарийн бичгийн дарга Ц.Оюундарь нар 21 аймаг, 9 дүүргийн намын удирдлагуудтай видео хурал хийж, цаг үеийн асуудлаар санал бодлоо солилцлоо.

Энэхүү хурлаар Улс төрийн намуудын хууль өөрчлөгдөхтэй холбоотойгоор намын их хурал хойшилсон талаар мэдээллээ. Мөн Шинэ Засгийн газар байгуулагдаж сайд нарын томилгоо дуусч, энэ долоо хоногтоо багтаан дэд сайд нарыг томилно гэдгийг хэлсэн. Тэрчлэн ирэх долоо хоногт батлагдсан төсөвтөө уялдуулан төсвийн тодотгол хийнэ гэдгийг ч тэрээр дуулгасан юм.

Улс орны эдийн засгийн нөхцөл байдал хүнд байгаа ч аймаг, сумдын төсөвт хасалт хийхгүйгээр шийдвэрлэх арга зам байгаа талаар аймаг дүүргийн намын дарга нарт дуулгав. Мөн Ардчилсан хувьсгалын 25 жилийн ой нь 1989-1990 он хүртэлх түүхэн үйл явдал учраас энэхүү үйл явдлуудыг нэг жилийн хугацаанд буюу ирэх оны арванхоёрдугаар сарын 10 хүртэл тэмдэглэхээр төлөвлөсөн. Тиймээс аймаг орон нутгийнхныг ч мөн адил энэ хугацаанд төлөвлөсөн ажлуудаа хийхийг сануулсан юм.

Ардчилсан намын дарга З.Энхболд аймаг, дүүргийн Намын дарга нарын асуултанд хариулж “Улс төрөөс ангид байж төрийн ажлаа сайн хийх Засгийн газар байгуулсан учраас улс төр бус төрийн ажлыг хийнэ. Тиймээс улс даяараа нэг ойлголттой байх үүднээс тун удахгүй Ерөнхий сайд нэгдсэн мэдээлэл хийхээр болсон” гэв.

Улс төрийн намуудын тухай хуультай холбоотойгоор намын дүрмийг өөрчилж, шинэчлэх асуудал гарч ирэхийг сануулаад энэхүү хуулийг Монгол улсад үйл ажиллагаа явуулж байгаа бүх намууд дагаж биелүүлэх учраас өрсөлдөөний хуулийг ижил, тэнцүү байхаар нарийвчлан гаргасан хууль болно гэдгийг ч хэллээ.

Дээрх асуудлуудаас гадна намын удирдлага хагас хэвтээ тогтолцоотой байх, намын дүрэмд гишүүнчлэлгүй болох гэх мэт асуудлуудаар аймгуудийн намаас нэгдсэн журмаар бичгээр саналаа ирүүлэх үүрэг өглөө.

Аймгийн намын дарга нар Ардчилсан намын дарга З.Энхболдод намын даргаар сонгогдсонд баяр хүргэж, намын үйл ажиллагаа хэвийн явагдаж байгаа талаараа тайлагнав.

Ардчилсан намын удирдлагууд санал бодлоо солилцлоо