Эдийн засаг, эдийн засаг, эдийн засаг гэсэн хатуу зарчим өнөөгийн Монголын нөхцөлд тохирох бодлого биш хэмээн Үйлдвэрчний эвлэлийнхэн үзэж байна.

Юм л бол хасна, танана, цомхотгоно гэх үг эрх баригчдын амнаас гарах болсон нь иргэдийн халаасан дахь хэдхэн бор цаас хаанаа ч хүрэхгүй болсон энэ үед тийм ч зөв бодлого биш гэдгийг өнөөдөр Монголын үйлдвэрчний эвлэлийн холбооноос хийсэн хурлын үеэр Х.Амгаланбаатар дарга онцоллоо. Тиймээс МҮЭХ-ны зүгээс эдийн засгийн хямралтай байгаа энэ үед ээлжит “Хөдөлмөр нийгмийн гурван талт хэлэлцээр”-ээ эхлүүлж байгаагаа мэдэгдсэн юм.

Хэлэлцээрийн хүрээнд дөрвөн гол асуудлыг онцолж байна. Тухайлбал нэгдүгээрт, эдийн засгийн хямралтай энэ үед Засгийн газар, иргэд хамтарсан төлөвлөгөөний хүрээнд ажиллах. Хоёрдугаарт, цалин тэтгэвэр тэтгэмж хэзээнээс хэдэн хувиар тодорхой нэмэгдэх вэ гэдэгт тодорхой хариу өгөх.

Гуравдугаарт, ажлын байрыг хадгалах тал дээр төрийн бодлого тодорхой байх. Дөрөвдүгээрт, цалин тэтгэвэр, тэтгэмжийг индексжүүлэх тухай хууль, үнэ бүрдэлтийн тухай хуулийг ойрын хугацаанд батлах хэрэгтэй гэж үзэж буйгаа илэрхийлсэн. Гол нь эдийн засгийн хямрал зөвхөн энэ оноор дуусахгүй учраас иргэдийн ажлын байрыг эрхзүйн орчны хүрээнд хамгаалах шаардлагатай гэж үзсэн юм. Энэ үүднээс дээрх хоёр хуулийг нэн тэргүүнд батлах хэрэгтэй гэдгийг онцоллоо.

Ганцхан жишээ дурьдахад, өнөөдөр улсын хэмжээнд 180 мянган төрийн албан хаагч байгаа юм. Үүний 68 хувь нь зөвхөн төрийн үйлчилгээний салбарт ажилладаг иргэд.

Тиймээс эдийн засгийн хямралаар нээнтэглэн цомхотгол хийхдээ төрийн үйлчилгээний салбарынхныг үүнд өртөхөөс сэргийлэх хэрэгтэйг сануулж байна. Төрийн албаны данхар бүтцийг цөөлөх бодлого барихдаа аль салбарыг голчлон авч үзэх вэ гэдгийг тодорхойлох нь чухал гэдгийг онцолсон юм.

Иргэдийн ажлын байрыг эрхзүйн хүрээнд хамгаалах хэрэгтэй гэв