Улсын Их Хурлын гишүүн Л.Эрдэнэчимэг, З.Баянсэлэнгэ, Д.Сарангэрэл нар өнөөдөр Монгол Улс гурван сая дахь иргэнээ хүлээн авах гэж буйтай холбогдуулан Нийслэлийн II, III дугаар төрөх эмнэлгийн үйл ажиллагаатай танилцлаа.

Нийтдээ 300 мянга гаруй хүн амтай Нийслэлийн Баян зүрх дүүрэгт байрладаг III дугаар төрөх эмнэлэг нь өнөөдөр 45 ортой, 32 эмч, 118 ажилтантайгаар үйл ажиллагаа явуулж байгаа хэмээн тус эмнэлгийн дарга Д.Бат Очир танилцуулсан юм.

Мөн тэрээр эмнэлэг хэт ачаалалтай ажиллаж байгаагаас үүдэн ихээхэн эрсдэл бүхий нөхцөл байдлууд үүссэн хэмээн дуулгав.

Харин 2015 оны төсөвт эм, эмнэлгийн хэрэгслийн зардлуудыг тодорхой хувиар танаснаас үүдэн бэрхшээл үүсээд байгаа юм байна.

Эмнэлгийн танилцуулгатай холбогдуулан Улсын Их Хурлын гишүүн Л.Эрдэнчимэг “Монгол Улс 10-аад хоногийн дараа гурван сая дахь иргэнээ хүлээн авна гэсэн мэдээлэл бий. Засгийн газраас энэ үйл явдлыг тэмдэглэн өнгөрүүлэхээр холбогдох тогтоол шийдвэрүүд гарсныг та бүхэн мэдэж байгаа.

Хүн хүч, нөөц бололцоо хүрэлцээгүй энэ нөхцөлд төрөх эмнэлгийг гал алдуулахгүйгээр ажиллуулж байгаа нь төр, аливаа нэг Засгийн газрын гавьяа биш. Харин эмнэлгийн эмч, ажилтан та бүхний гавьяа юм" гэв.

III дугаар төрөх эмнэлгийн үйл ажиллагаатай танилцсны дараа гишүүд төрөөс хүн амаа өсгөх, төрөлтийг дэмжих олон бодлого явуулсаар байгаа атлаа шинэ иргэнээ хүлээж авах төрөх эмнэлгүүддээ огт хөрөнгө оруулалт хийхгүй байгааг тэмдэглээд, Засгийн газрын анхаарлыг энэ асуудалд хандуулахаар УИХ-ын эмэгтэй гишүүд ажилласаар байх болно гэлээ.

Үүний дараа Нийслэлийн II дугаар төрөх эмнэлгийн үйл ажиллагаатай танилцлсан юм. Нийслэлийн II төрөх эмнэлэг гурван сая дахь иргэнийг хүлээн авахаар бэлтгэлээ базааснаа танилцуулав.

Тус эмнэлгийн хувьд тулгамдаад байгаа гол асуудал нь хуучирсан барилга болоод байгаа талаар мөн танилцуулж, энэ тал дээр холбогдох байгууллагуудын анхаарлыг хандуулж, түргэн шийдвэрлүүлэх тал дээр дэмжлэг үзүүлэхийг хүссэн юм хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

III амаржих газрын барилга хэт хуучирсан нь асуудал болоод байгаа гэв