НИТХ-ын ээлжит 23 дугаар хуралдаанаар “Газар шинэчлэн зохион байгуулах үйл ажиллагааны журам”-ыг хэлэлцэн баталлаа.

Өнөөдрийн байдлаар Улаанбаатар хотын суурьшил бүхий 27.680 га нутаг дэвсгэрийн 21.823 га газрыг гэр хороолол эзэлж байна. Гэр хороололд Улаанбаатар хотын нийт хүн амын 68 гаруй хувь буюу 186.000 гаруй өрх амьдарч байна гэсэн статистик судалгаа байгаа юм. Иймээс гэр хорооллыг орон сууцжуулах хүрээнд НИТХ-ын ээлжит 17 дугаар хуралдаанаар “Нийслэлийн орон сууцны хөтөлбөр”-ийг баталсан.

Тус хөтөлбөрийн нэг чиглэлд иргэдийн оролцоотойгоор газар шинэчлэн зохион байгуулж, газар ашиглалтыг сайжруулах, газрын үнэ цэнийг нэмэгдүүлэх, нийгмийн болон инженерийн дэд бүтэцтэй амины орон сууц голлосон хороолол болгон хөгжүүлэх үйл ажиллагааг тусгасан байдаг.

Энэхүү журам нь нийслэлийн иргэдийн эрүүл аюулгүй, тохилог амьдрах орчинг бүрдүүлэх, газар ашиглалтыг сайжруулах, гэр хорооллыг инженерийн болон нийгмийн дэд бүтэцтэй амины орон сууцны хороолол болгон хөгжүүлэх үйл ажиллагааг иргэдийн оролцоотойгоор газар шинэчлэн зохион байгуулах хэлбэрээр хэрэгжүүлэхэд иргэн, хуулийн этгээд, төрийн байгууллага хооронд үүсэх харилцааг зохицуулах бөгөөд 6 бүлэг 98 зүйл заалттай.

Уг журам хэрэгжиж эхэлснээр иргэд амины орон сууц барих санхүүгийн эх үүсвэргүй, зээл авах болон зээлээ төлөх боломжгүй бол шууд төлбөргүйгээр газрынхаа нэг хэсгийг төлбөрийн хэрэгсэл болгож амины орон сууц барих санхүүгийн эх үүсвэрээ шийдэх, иргэд өөрийн газрыг эдийн засгийн эргэлтэд оруулах, орчин үеийн шаардлагад нийцсэн эрүүл ахуйн шаардлага хангахуйц орон сууцтай болох, Улсын төсвийн хөрөнгийг хамгийн бага хэмжээгээр зарцуулж, иргэдийн өөрсдийн хүсэл санаачилгын дагуу өөрсдийн хөрөнгөөрөө шийдэх боломж бүрдэх, жижиг дунд үйлдвэрийг дэмжих, жижиг дунд бизнес эрхлэгчдэд хөгжих боломжийг бүрдүүлж өгөх зэрэг олон талын давуу талтай гэдгийг нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбат хэллээ.

“Газар шинэчлэн зохион байгуулах” үйл ажиллагаанд иргэдийн санал санаачилгыг тусгаж, иргэдийн оролцоотойгоор хэрэгжүүлэх 9 алхам төсөл байдлаар явуулахаар төлөвлөгөө гарган ажиллаж байгаа юм. Ингэхдээ иргэд газар шинэчлэн зохион байгуулалтад хамрагдах талаар хүсэлт гаргана – Гэр хорооллыг орон сууцжуулах төсөл хүсэлтийг хүлээн авч анхан шатны судалгаа хийнэ – Улаанбаатар хотын Ерөнхий төлөвлөгөөтэй уялдуулан хамрах хүрээг тогтооно – Тогтоосон хамрах хүрээнд иргэдийг бүлгээр зохион байгуулна – Мэдээлэл, сурталчилгаа, сургалт, суурь судалгаа хийнэ – Иргэдийн санал санаачилгыг тусгасан хотын ерөнхий төлөвлөгөө бүхий төслийг боловсруулна – Боловсруулсан төслийг Ерөнхий төлөвлөгөөний газар, Өмчийн харилцааны газар гэх мэт байгууллагатай харилцан зөвшилцөнө – Иргэдийн ашиг сонирхол болон хотын ерөнхий төлөвлөгөөнд нийцсэн төсөл бэлэн болно – Төслийг НИТХ холбогдох төсвийн хамт батлах юм. Мөн газар шинэчлэн зохион байгуулах үйл ажиллагааг төслийн бэлтгэл үе шат, төсөл боловсруулах үе шат, төсөл хэрэгжүүлэх үе шат, төслийн төгсгөлийн үе шат гэсэн үндсэн 4 үе шаттайгаар хэрэгжүүлэх юм.

Энэхүү журмын талаархи Тэргүүлэгчдийн байр суурийг хүргэе.

Нийслэлийн Засаг дарга бөгөөд Улаанбаатар хотын захирагч Э.Бат-Үүл:

Газар шинэчлэн зохион байгуулах үйл ажиллагаа нь Гандангийн нэг гудамжийг тохижуулсантай адилхан үйл явцтай. Өөрөөр хэлбэл, дэд бүтэц шийдэгдээгүй, зам тавигдаагүй, сургууль, цэцэрлэгийн хүрэлцээгүй газруудад цэвэр, бохирын шугам татаад өгье, зам тавиад өгье гэж байгаа.

Дээр нь иргэд нэгдэн нөөцийн газраасаа хандивлаж сургууль, эмнэлэг барих талбайг гаргаад өгчихвөл сайн байна. Ийм шинэ хэлбэрийн ажлыг журамлах гэж байна. Энэхүү ажил дээр хоёр янзын хөрөнгийн эх үүсвэр байгаа.

Нэгдүгээрт, хотын захиргаа дэд бүтцийн ажлыг хийж, хандивын талбай дээр сургууль, цэцэрлэгийг нь бариад өгье. Эсвэл хувийн хэвшлээр буюу компаниар дэд бүтцээ хийлгэж, сургууль цэцэрлэгээ бариулж болно гэсэн юм.

Э.Бат-Үүл: Цэвэр, бохирын шугам татаад өгье, зам тавиад өгье