УИХ дахь Ардчилсан намын бүлэг өнөөдөр хуралдаж мэдээлэл хийлээ.

Өнөөдрийн бүлгийн хуралдаанд “Эрдэнэс МГЛ” компанийн удирдлагууд болон Уул уурхайн яамны холбогдох албан тушаалтнууд дуудагдсан байсан. Учир нь ЗГХЭГ-ын дарга С.Баярцогтыг огцруулах хүсэлтийг Г.Уянга, С.Ганбаатар тэргүүтэй гишүүд өнгөрсөн долоо хоногт УИХ-ын даргад өргөн барьсантай холбогдуулан мэдээлэл авсан бололтой.

С.Баярцогтыг огцруулах үндэслэлд “Эрдэнэс-Оюу толгой” компанид улсын төсвийн 17.5 тэрбум төгрөгөөр Америкийн нэгэн хуулийн компаниас зөвлөх үйлчилгээ авах гэж байгаа хэмээн дурдсан байсан. Ардчилсан намын бүлэг өнөөдөр хэлэлцээд С.Баярцогтыг огцруулах хангалттай үндэслэл биш харин ч эсрэгээрээ илт гүтгэсэн шинж чанартай мэдээллийг олон нийтэд цацсан гэдэг байр суурийг илэрхийллээ.

Бүлгийн дарга Б.Гарамгайбаатар “Төсвөөс гаргаж буй 17.5 тэрбум төгрөг нь эргэн төлөгдөх нөхцөлтэй байсан. Мөн С.Баярцогт ажлын хэсгийн ахлагч Б.Болорын хүсэлтээр гарын үсгээ зурсан. Огцруулахаар өргөн барьсан бичигт С.Баярцогт сайдыг гэрээ хийгээд мөнгө шилжүүлсэн байна гэж бичсэн. С.Баярцогт сайд гэрээ хийдэг хүн биш.

“Эрдэнэс МГЛ” компани гэрээ байгуулж хийдэг. Ямар нэгэн байдлаар нэг ч төгрөг мөнгө шилжээгүй. Тиймээс энэ бол цэвэр гүтгэлэг гэж үзэж байна” гэв.

Б.Гарамгайбаатар: С.Баярцогт сайд гэрээ хийдэг хүн биш, цэвэр гүтгэлэг