УИХ-ын гишүүн Г.Шийлэгдамбатай ярилцлаа

-Архи согтууруулах ундаа хэтрүүлж хэрэглэсэн иргэдийг эмнэлэг хүлээж авдаг болсонд салбарын яам ямар байр суурьтай байгаа вэ?

Эрүүл мэндийн тусламж үйлчилгээг үзүүлэхэд бэрхшээл хүндрэл үүсгэж, эрүүл мэндийн салбарынхны анхаарлыг ихээр татаж байгаа асуудал бол эмнэлгийг эрүүлжүүлэх байр болгосон явдал юм.

Тэртээ тэргүй хүндрэлтэй нөхцөл байдалд үйл ажиллагаагаа явуулж байгаа эмнэлгийн тусламж үйлчилгээнд том ачаа болж, тусламж үйлчилгээ хэвийн явах ажиллагааг ноцтойгоор алдагдуулж байна. Тиймээс Эрүүл мэнд, спортын яамнаас энэ асуудлыг тавьж, ард иргэдэд бодит байдлыг харуулна.

Цаашлаад холбогдох байнгын хороо, Улсын Их хурал, Засгийн газарт энэ асуудлыг танилцуулна. Амьдралд бодитоор хэрэгжих боломжгүй шийдвэрийг эргэн харж, өмнө нь цагдаагийн байгууллагад харъяалагддаг байсан тэр зохицуулалтад нь эргэн оруулах шаардлагатай гэж үзэж байна.

-Нөхцөл байдал яг ямар байгаа вэ?

Эрүүл мэндийн салбар бол их эмзэг. Гэтэл энэ салбарт дарамт бий болж байна. Тиймээс нэмж дарамт учруулахгүй байх асуудалд анхаарах болно.

Архи согтууруулах ундаа хэтрүүлэн хэрэглэсэн иргэдэд үйлчлэхийн цаана эрүүл мэндийн тусламж үйлчилгээ нэн шаардлагатай байгаа иргэдэд бэрхшээл хүндрэл учрах ноцтой эрсдэл бий болоод байна.

Согтуу иргэдэд үйлчилж байгаа эмч мэргэжилтнүүд эрүүл мэндийн тусламж нэн шаардлагатай байгаа иргэдэд хүрч үйлчлэх асуудал бэрхшээлтэй болоод байна. Тиймээс энэ асуудлыг даруй шийдэх ёстой.