“Гацууртын ордын төрийн эзэмшлийн хувь тогтоох тухай” Улсын Их Хурлын тогтоолын төслийн хэлэлцэх эсэх асуудлыг үргэлжлүүлэн хэлэлцэв.

Тогтоолын төслийн хэлэлцэх эсэх асуудлыг энэ сарын 11-ний өдрийн чуулганы нэгдсэн хуралдаанаар хэлэлцэж төсөлтэй холбогдуулан гишүүд асуулт асууж тодруулсны дараа УИХ дахь МАХН-МҮАН-ын “Шударга ёс” эвслийн бүлэг энэ төслөөр Гацууртын ордыг урт нэртэй хуулийн үйлчлэлээс гаргах, мөн төрийн эзэмшлийн хувь хэмжээг бууруулахаар оруулж ирсэн тул асуудлыг дахин нягталж нэг мөр ойлголттой болох үүднээс уг тогтоолын төслөөр ажлын 5 хоногийн завсарлага авах хүсэлт гаргасныг ёсоор болгосон юм.

Эвслийн бүлгийн авсан завсарлагын хугацаа дууссан тул тогтоолын төслийг хэлэлцэх эсэхтэй холбогдуулан УИХ-ын гишүүн О.Баасанхүү, Ц.Оюунбаатар, Я.Содбаатар, Г.Уянга, Л.Цог, Б.Бат-Эрдэнэ нар үг хэлсний дараа байнгын хорооны саналын томьёоллоор санал хураалт явуулахад нэгдсэн хуралдаанд оролцсон гишүүдийн олонхын дэмжлэг авч чадаагүй тул тогтоолын төслийг төсөл санаачлагчид нь буцаахаар болов.

УИХ-ын гишүүн Я.Содбаатар

"Бид уул уурхайн асуудалд хэтэрхий улстөрждөг болсон байна. Энэ танхимд байгаа бүх хүмүүс уурхайчин, геологчин болчих юм. Геологи, уул уурхайн салбар гэдэг чинь бие даасан Шинжлэх ухаан. Бас өөрийн гэсэн онол бүхий салбар. Манай хуульч, эдийн засагч нар бид тэдэн жил ажилласан гээд магтдаг. Яг үүнтэй адилхан уул уурхайн салбарт дуртай болгон нь шүлс үсчүүлээд байдаг салбар биш гэдгийг анхааруулж хэлмээр байна"

УИХ-ын гишүүн О.Баасанхүү

"Манай бүлгийн хуралдаанд ажлын хэсэг мэдээлэл өгөхдөө яалт ч үгүй 20 хувийг авъя, үгүй бол мөнгө өгье гэсэн. Миний хувьд ний нуугүй хэлэхэд хоноцийн сэтгэлээр хандаад байна гэж бодоод байна. Хэрвээ хувийн нэг компани, өөр нэг компанитай хувь тохирох гээд явж байсан бол ийм хачин зүйл оруулж ирэхгүй байсан л даа"

Гацууртын ордын асуудлыг буцаалаа