Хүнс, Хөдөө аж ахуйн сайд Р.Бурмаа Куба Улсаас Монгол Улсад суугаа онц бөгөөд бүрэн эрхт элчин сайд Омар Лауро Марреро Бетанкурыг хүлээн авч уулзав.

Уулзалтын эхэнд  сайд Р.Бурмаа  уламжлалт найрсаг харилцаатай Куба улстай хөдөө аж ахуйн салбарт сүүний үүлдрийн ямааны гүн хөлдөөсөн үр импортлох, бэлчээрийн ургамал хамгааллын бодисын худалдаа болон үйлдвэрлэлийн туршилтын  чиглэлээр  хамтран ажилллаж  ирснийг  цохон тэмдэглэлээ. 

Элчин сайд Омар Лауро Марреро Бетанкур хоёр орны хөдөө аж ахуйн  салбарын хамтын  ажиллагааг  сэргээн  хөгжүүлэх сонирхолтой  байгаагаа илэрхийлээд Куба улсын үндэсний үйлдвэрлэгчдийн болон судалгаа шинжилгээний   бүтээгдэхүүнийг Монгол Улсын зах зээлд нийлүүлэх боломж байгаа талаар онцоллоо.

Мөн бэлчээрийн ургамалд хөнөөл учруулж буй мэрэгч амьтантай (өлийн цагаан огтоно) тэмцэх зорилгоор ургамал хамгааллын эрдэм шинжилгээний хүрээлэнгийн дэргэд хамтарсан үйлдвэр байгуулах боломжийн талаар хоёр  тал санал бодлоо солилцлоо.