УИХ-ын Өргөдлийн байнгын хорооноос өнөөдөр нийслэлийн гэр хорооллын нөхцлийг сайжруулах, дахин төлөвлөх, орон сууцжуулах асуудлаар уулзалт зохион байгууллаа.

Гэр хорооллын дахин төлөвлөлтийн хүрээнд хийгдэж байгаа ажлын явц байдал, хөрөнгө оруулалт, эрх зүйн орчин, тулгамдаж байгаа асуудлаар Нийслэлийн гэр хорооллын хөгжлийн газрын дарга Ш.Ганхуяг танилцуулга хийсэн юм. Нийслэлийн Иргэдийн Төлөөлөгчдийн Хурлаар гэр хорооллын дахин төлөвлөлтөд хамрагдах 24 байршил баталсан бөгөөд одоогийн байдлаар 16109 нэгж талбар бүхий 1547,8 га 75 хэсэгчилсэн талбайд үндэсний 34 аж ахуйн нэгж төсөл хэрэгжүүлж байгаа юм байна. Байнгын хорооны гишүүд  ирэх дөрөвдүгээр сард дахин төлөвлөлтөд хамрагдсан зарим газруудаар явж  ажлын явц байдалтай танилцахаар болов. Эдгээр ажлуудын үр дүнд ажлын хэсэг санал, дүгнэлт, шийдвэрийн төсөл боловсруулан Өргөдлийн байнгын хорооны хуралдаанаар  хэлэлцүүлэхээр тогтсон юм.

Уулзалтад УИХ-ын Өргөдлийн байнгын хорооны дарга О.Баасанхүү, ажлын хэсгийн ахлагч, УИХ-ын гишүүн Ж.Батзандан, Д.Сумъяабазар, Нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч дарга С.Очирбат, Нийслэлийн хэрэгжүүлэгч агентлаг Гэр хорооллын хөгжлийн газрын дарга Ш.Ганхуяг, Нийслэлийн хөрөнгө оруулалтын газрын орлогч дарга С.Цэдэнсодном, “Гэр хорооллыг орон сууцжуулах төсөл” Орон нутгийн өмчит үйлдвэрийн газрын дарга А.Лхагвадорж болон бусад холбогдох албан тушаалтнууд, иргэдийн төлөөлөл оролцлоо.