Засгийн Газрын шадар сайд, Улсын онцгой комиссын дарга М.Энхболд саяхан Архангай, Өвөрхангай аймгийн мал хаваржилтын байдалтай танилцжээ. Шадар сайд манай оронд нүүрлэсэн зуд турхыг сөрөн туулахад гадаад дотоодын байгууллагууд түүний дотор хойд, урд хоёр хөрш, дэлхийн донор орнууд болоод НҮБ ихээхэн анхаарал хандуулж, өгөөмөр гараа сунгаж байгааг танилцуулсан.

Харин зуд нүүрлэсэн аймгуудад удаа дараа олгож буй өвс тэжээл, бараа материалын зарцуулалтад анхаарал тавихыг сануулж байв. Энэ чиглэлээр зарим аймагт ч ноцтой дутагдал илэрчээ. Тухайлбал Хөвсгөл аймагт зудын сангаас дулааны станцдаа 20 сая төгрөг урьдчилгаа нэрээр зарнуулсан. Завхан аймаг өвс тэжээлийн зардалд ном хамтатган шахсан зохисгүй зүйлүүдийг дурьдаж харин Архангай аймагт энэ ажил хэвийн явагдаж буйг сайшаасан.

Эцэст нь шадар сайд М.Энхболд малын сэг зэм устгах ажлыг шуурхайлах, ялангуяа төв замын дагуух сэг зэмийг далдалж цэвэрлэх, бойжуулах ажлыг зохистой явуулах, малд анхаарал тавихаас илүүтэйгээр малчдад эд материал, сэтгэл зүйгээр туслахыг зөвлөлөө. Тэрчлэн орон нутагт аливаа бүхнийг бэлэнчлэн, юун түрүүнд хөрөнгө мөнгө нэхэж байдаг зуршлаа өөрчлөхийг анхаарууллаа.