Онцгой байдлын ерөнхий газрын дарга Т.Бадрал өчигдөр Монгол Улсын Ерөнхийлөгч, Зэвсэгт хүчний ерөнхий командлагч Ц.Элбэгдоржоос бригадын генерал цолны мөрдэс, үнэмлэхээ гардан авлаа.

Ерөнхийлөгч Монгол цэргийн өдрийг тохиолдуулан гурван хүнд цэргийн дээд цол хүртээсний нэг нь Т.Бадрал.Зэвсэгт хүчний ерөнхий хянан шалгагч П.Доржсүрэн, Тагнуулын ерөнхий газрын дэд дарга С.Эрдэнэ нар энэ сарын 18-нд Төрийн тэргүүнээс цолны мөрдэс, үнэмлэхээ авсан бол Т.Бадрал Японд болсон Гамшгийн эрсдэлийг бууруулах дэлхийн III бага хуралд оролцоод эзгүй байсан юм.

Онцгой байдлын асуудал эрхэлсэн байгууллагын түүхэнд анх удаа генерал цолтон төрж байгаа нь энэ. ОБЕГ-ын бие бүрэлдэхүүн өчигдөр анхны генералаа хүлээн авч, хүндэтгэл үзүүллээ. Ёслолын ажиллагаанд Монгол Улсын Шадар сайд У.Хүрэлсүх, сайдын ахлах зөвлөх Д.Батбаатар, Н.Энхтайван нар оролцов.