УИХ дахь Бие даагч гишүүд “Оюутолгой”-н гэрээний талаар байр сууриа илэрхийллээ. “Эрдэнэт” үйлдвэрийн гүйцэтгэж буй үүргийг хуваалцана хэмээн найдаж байсан “Оюутолгой” төслийн гэрээ муу болсноос өнөөдөр манай улсад ашиггүй байгааг тэд шүүмжилсэн юм.

УИХ- ын гишүүн Ц.Даваасүрэн “Ерөнхий сайд “Оюутолгой”-г хөдөлгөнө гэж яриад байгаа. Гэхдээ “Оюутолгой” бол явж байгаа төсөл. Хамгийн гол нь бидний хүлээсэн, тэдний яриад байсан үр дүн гарахгүй байгаад асуудал байна. “Оюутолгой” өнгөрсөн жил 805.7 мянган тонн зэсийн баяжмал ачуулснаас 189 мянган тонн нь цэвэр зэс байсан. Өнгөрсөн жилийн зэсийн дундаж ханшаар бодоход энэ нь 1.2 тэрбум ам.доллартай тэнцэх юм. Алт л гэхэд 19.5 тонн экспортолж, 880 сая ам.долларын ашиг олсон.

Үндсэндээ хоёр тэрбум ам.доллар буюу 3.6 их наяд төгрөгийн борлуулалт хийсэн байна.Үүнээс татварт хамгийн их буюу Ашигт малтмальш нөөц ашигласны төлбөрт 111 тэрбум төгрөг төлсөн бол бусад татвар ороод нийт 300 тэрбум төгрөг төлсөн. Үүнээс өрөндөө суутгаад Монголд 100 сая ам.доллар ч орж ирж чадахгүй байгаа юм. Гэтэл удирдлагын зардалдаа үүнээс их мөнгө авч байгаа” гэв.

Энэ онд “Оюутолгой” компани 820 мянган тонн зэсийн баяжмал ачуулах таамаг байгаа аж. Үүнээс 310 орчим тэрбум төгрөгийг татварт өгч, өрөө авна. Өөрөөр хэлбэл, нийт борлуулалтын 4-5 хувийг л Монголд үлдээж буй. Ашигт малтмалын нөөц ашигласны төлбөрт “Эрдэнэт” үйлдвэр 18 хувийн татвар төлж байхад “Оюутолгой” таван хувийн татвар төлж байгаа нь шударга бус гэж Х.Болорчулуун гишүүн хэллээ. Тиймээс энэхүү ашиггүй байдлыг засч, гэрээг харилцан үр ашигтай болгож байж хоёр дахь шатны хэлэлцээрийг явуулах ёстой гэсэн байр суурьтай байгаагаа илэрхийлэв.

Ц.Даваасүрэн: Оюутолгойн гэрээ ашиггүй