Ирээдүйн өв сангийн тухай болон холбогдох бусад хуулийн төслүүдийг хэлэлцэх эсэхийг өчигдөр УИХ-ын нэгдсэн чуулганаар хэлэлцлээ. Ерөнхийлөгч 2014.10.13-ны өдөр энэ хуулийн төслийг өргөн мэдүүлсэн юм.

Хууль санаачлагчийн илтгэлийг Ерөнхийлөгчийн Иргэний оролцоо, эдийн засгийн бодлогын зөвлөх Л.Дашдорж танилцууллаа. Дараа нь Төсвийн байнгын хорооны санал, дүгнэлтийг УИХ-ын гишүүн Р.Амаржаргал танилцуулсан юм. Хүний хөгжил сан үүргээ бүрэн гүйцэтгэж чадахгүй байгаа учраас Ерөнхийлөгч Ирээдүйн өв сангийн тухай хуулийн төслийг өргөн барьж, баялгаа бүх ард түмэнд зөв хүртээх ёстой гэж үзжээ.

УИХ-ын гишүүн Л.Цог “Бид чээж баян болчихлоо. Уул уурхайгаас олсон ашгаа хуримтлуулъя гээд Хүний хөгжил санг байгуулсан. Гэтэл одоо энэ сан юун хуримтлал, өртэй байна” гэсэн юм.

Мөн УИХ-ын гишүүн Ч.Улаан бидэнд хуримтлал үүсгэдэг, түүхэн уламжлалт соёл байхгүй. Ирээдүйн өв сангийн тухай хуулийг батлах нь зөв гэсэн юм. Гэхдээ одоогийн төслийг засварлах хэрэгтэй гэв.

Өнөөдөр УИХ-ын нэгдсэн чуулганаар хуулийн төслийг хэлэлцэх эсэх талаар санал хураах боллоо.Дашрамд хэлэхэд дэлхийн улс орнуудад баялгийн олон сан байдаг бөгөөд 5 үндсэн загвартай аж.

Ч.Улаан: Бидэнд хуримтлал үүсгэдэг, түүхэн уламжлалт соёл байхгүй