БОНХАЖЯ, Нөхөрлөлүүдийн үндэсний холбооноос хамтран байгаль хамгаалах нөхөрлөлүүд үүсч хөгжсөний 15 жилийн ойг угтсан Үндэсний хэмжээний анхдугаар чуулган Улаанбаатар хотноо болох гэж байгаатай холбогдуулан өгөөдөр Чингисийн талбайд өдөрлөг болж байна. Байгалийн нөөцийн хамтын ажиллагааны чуулган маргааш төрийн ордонд эхлэнэ.

Төрийн ордонд орох нөхөрлөлүүдийн төлөөлөл өнөөдрийн өдөрлөгт оролцож байгаа бөгөөд нийт 21 аймгийн 51 аж ахуйн нэгж, байгууллага оролцож байгаа юм байна. Маргаашийн чуулганаар байгалийн нөөц, ойн санг иргэдийн оролцоотойгоор хэрхэн хамгаалах, энэ менежментийг хэрхэн яаж хөгжүүлэх вэ гэдэг асуудлыг голчлон хэлэлцэх аж.

Энэ талаар Ойн бодлого зохицуулалтын газрын ахлах мэргэжилтэн Н.Энхтайван хэлэхдээ “Өнөөдөр ойн салбарын хувьд түүхэнд тэмдэглэгдэхээр өдөр болж байна. Учир нь АНУ-д дөрвөн жилд нэг удаа зохиогддог Дэлхийн ойн форумд БОНХАЖЯ-ны дэд сайд н.Хүрэлсүх тэргүүтэй Ойн бодлого зохицуулалтын газрын дарга нар оролцож байна.

Өнөөдөр УИХ-ын нэгдсэн чуулганаар Төрөөс баримтлах ойн бодлого гэсэн асуудал оролцоод дэмжигдэж, батлагдлаа Харин яг одоо Чингис хааны талбай дээр Ойн санг гэрээгээр эзэмшдэг нөхөрлөлүүд болон байгалийн нөөцийн хамтын менежментийн нөхөрлөлүүдийн хамтарсан өдөрлөг зохиогдож байна” гэлээ.

Ойн бодлогын тухай асуудал таван жилийн турш хэлэлцэгдэж явсаар өнөөдөр эцсийн байдлаар батлагдсан юм байна. Үүнд, ойн санг гэрээгээр эзэмшүүлэх, ойн санг нутгийн иргэдээр хамгаалуулах, байгалийн тодорхой нөөц баялагийг гэрээгээр эзэмшүүлж хамтын менежмент рүү шилжиж, хамтран ойн санг хамгаалах асуудлыг тодорхой болгох аж. Одоогийн байдлаар ойн санг хамгаалах 1600 гаруй нөхөрлөл нийт 3,1 сая га талбайг хамгаалж байна.

Ойн санг хамтын менежментээр хамгаална гэв