2009 оны 11 дүгээр сарын 11-ний байдлаар томуугийн А хүрээний /H1N1/ вирусийн халдвараар 934 хүн өвчлөөд байна.


Халдварын тархалт, авч хэрэгжүүлж байгаа арга хэмжээний талаар Засгийн газрын ажлын хэсгийн ахлагч, Монгол Улсын Шадар сайд М.Энхболдын мэдээллийг сонсов.
Ажлын хэсэг өндөржүүлсэн бэлэн байдлын дэглэмд шилжин, халдварын оношлогоо, эмчилгээнд хэрэглэх оношлуур, эм, эмнэлгийн хэрэгсэл, тоног төхөөрөмж, ариутгалын бодисыг гаалийн болон НӨАТ-аас чөлөөлүүлэв.

Хот хоорондын зорчигч тээврийн хөдөлгөөнийг 7 хоногийн хугацаатай хааж, ариутгал, халдваргүйтлийн тусгай машиныг Нийслэлийн ЗДТГ, ОБЕГ-т олгон, Зэвсэгт хүчний клиникийн эмнэлгийг тусгай эмнэлэг болгон ажиллуулахаар шийдвэрлэжээ.

Халдвар нэмэгдэж байгаатай холбогдуулан томоохон эмнэлгүүдэд нийт 255 ор нэмэлтээр дэлгэн, Оюутны 3 хотхон, Сувилахуйн сургуульд эмнэлгийн 4 нэгж нээн ажиллуулж байна.
Амьсгалын 20 ширхэг аппаратыг хүлээн авч эмнэлгүүдэд хуваарилан ажиллуулж эхэллээ. 1,3 тэрбум төгрөгийн үнэ бүхий вакцин, оношлуурын тендер зарлан энэ 7 хоногт багтан шалгарсан компанитай гэрээ байгуулах юм.
Эмч, эмнэлгийн ажилтнуудын илүү цагийн цалин, нэмэгдэл хөлс, эмнэлгүүдийн үйл ажиллагаатай холбоотой урсгал зардлуудыг санхүүжүүлж байна. Замын-Үүд, Сэлэнгэ аймгийн Сүхбаатар сумаас ирэх зорчигчдыг эмчийн хяналтан дор тусгай галт тэргээр Улаанбаатар хотод авчирлаа.

Холбогдох байгууллагууд амны хаалт, амин дэм, дархлаа сайжруулах бэлдмэл, зарим төрлийн хүнсний үнэ өсч байгааг хязгаарлах, зохицуулахаар ажиллан, зохиомлоор үнэ хөөрөгдөж байгаа байгууллага, аж ахуйн нэгтэй хариуцлага тооцдог эрх зүйн орчин бүрдүүлэхээр хуулийн төсөл боловсруулжээ. Вирусийн халдвараас жирэмсэн эхчүүдийг хамгаалах зорилгоор төрөхийн өмнөх амралтнаас 30 хоногийн өмнө цалинтай чөлөө олгож байхыг байгууллага, аж ахуйн нэгжийн дарга нарт уриаллаа. Жирэмсэн болон амаржсан эмэгтэйд үзүүлэх тусламж үйлчилгээний чанарыг сайжруулах, дархлааг сайжруулах ажил хийгдэж байна.
Ерөнхий боловсролын сургуулийн сурагчдад онлайн хичээлийг 9 чиглэлээр 76 сэдвээр явуулж эхэллээ.

Цар тахлын дэгдэлтийг хяналтад байлгах, тэмцэх, урьдчилан сэргийлэх чиглэлээр хамтарч ажиллахыг бүх шатны байгууллага, иргэдэд уриалж хандивын данс нээв.