Монгол улсын Засгийн газар, Швейцарийн Засгийн газартай хамтран тогтвортой хөгжлийн үзэл баримтлалыг Монголын ард түмэн болон шийдвэр гаргах түвшинд ойлгуулах, дэлгэрүүлэх, улс эх орноо цаашид тогтвортой хөгжлийн замаар хөгжүүлэх олон нийтийн хандлагыг бий болгох зорилготойгоор “Тогтвортой хөгжлийн боловсрол” төслийг хэрэгжүүлж эхэллээ.

Төслийн нээлтийн үйл ажиллагаа 2015 оны зургадугаар сарын 12-ны баасан гаригт “Шангри-Ла” зочид буудлын “Нью Йорк” танхимд болох бөгөөд уг арга хэмжээнд БСШУЯ, БОНХАЖЯ, Германы олон улсын хамтын ажиллагааны нийгэмлэг (GIZ), Швейцарийн боловсролын салбар дахь олон улсын хамтын ажиллагааны хүрээлэн (IZB)-гийн төлөөлөгчид оролцоно.

Мөн Багшийн мэргэжил дээшлүүлэх институт, Насан туршийн боловсролын төв, Боловсролын хүрээлэн, Германы олон Улсын хамтын ажиллагааны нийгэмлэгийн холбогдох төсөл, Монгол Улсын Боловсролын их сургууль,Байгаль орчны мэдээлэл сургалтын төв, Дэлхийн банк , НҮБ-ын Хөгжлийн хөтөлбөр зэрэг байгууллагын төлөөлөл оролцох юм.

Нээлтийн үйл ажиллагааны үеэр “Тогтвортой хөгжлийн боловсрол” төсөлд чиглэсэн бодлого, дэмжлэгийн талаар танилцуулга хийх бөгөөд цаашид хамтран ажиллах байгууллагуудтай үр дүнтэй харилцаа холбоо тогтоож, төслийг амжилттай хэрэгжүүлэхэд чиглэсэн чухал алхам болох юм.

Монгол Улсын Засгийн Газар 1992 оны Рио Де-Жанейро хотноо зохиогдсон Байгаль орчин, хөгжлийн талаарх НҮБ-ын дээд хэмжээний уулзалтаас хойш тогтвортой хөгжлийн бодлогыг Монгол Улсад хэрэгжүүлэх талаар идэвхи санаачлага гарган ажиллаж ирсэн. Үүний нэг тод жишээ нь энэ удаагийн “Тогтвортой хөгжлийн боловсрол” төсөл юм. Төслийн эхний үе шат 2015 оны нэгдүгээр сараас 2017 оны арванхоёрдугаар сарыг дуустал хэрэгжих ба үндсэн хоёр бүрэлдэхүүн хэсэгтэйгээр үйл ажиллагаагаа явуулна.

Нэгдүгээрт, тогтвортой хөгжлийн боловсролын үзэл санааг ерөнхий боловсролын 628 сургуулийн сургалтын хөтөлбөрт тусгаж, шинэчлэх зорилттой юм. Хоёрдугаарт, олон нийт болон шийдвэр гаргагч нарт тогтвортой хөгжлийн боловсрол, тогтвортой хөгжил, ногоон хөгжлийн тухай мэдээлэл, мэдлэг, үзэл санааг хүргэх ба төсөлд хамрагдсан аж ахуйн нэгж, компани, байгууллагуудад байгаль орчны удирдлагын тогтолцоог нэвтрүүлж, ISO 14001 баталгаажуулалт хийлгэх зорилттой юм.