Чингэлтэй дүүргийн Засаг дарга Д.Ганболд хуулиар олгогдсон бүрэн эрхийнхээ хүрээнд шийдвэр гаргаж Эх, үрсийн баярын өдрийг тохиолдуулан дүүргийнхээ хөгжлийн бэрхшээлтэй болон зорилтот бүлгийн 88 хүүхдийн эмчилгээ, асаргаа, сувилгааны зардалд мөнгөн дэмжлэг үзүүлэх батламж гардуулах арга хэмжээ 5 дугаар сарын 30-нд боллоо.

Мөн Засаг даргын Тамгын газрын Нийгмийн хөгжлийн хэлтэс, Хүүхэд, гэр бүлийн хөгжлийн төвийнхөн оролцов. Арга хэмжээг Чингэлтэй дүүргийн Засаг дарга Д.Ганболд нээж хэлсэн үгэндээ , хүрэлцэн ирсэн хүүхэд, багачууд, эх, эцгүүдэд талархал илэрхийлээд, иргэдийнхээ эмчилгээ, сувилгааны зардалд зориулсан буцалтгүй тусламж үзүүлэх эрх дүүргийн Засаг даргад хуулийн хүрээнд олгогдсон байдгийг тодотгов.

Чингэлтэй дүүргийн Иргэдийн Төлөөлөгчдийн Хурлын дарга Д.Бат-Эрдэнэ, Чингэлтэй дүүргийн Засаг дарга Д.Ганболд, Засаг даргын Санхүү, эдийн засгийн асуудал хариуцсан орлогч Б.Мөнхбат, Засаг даргын Тамгын газрын дарга Ж.Эрдэнэбат нарын албаны хүмүүс зорилтот бүлгийн хүүхдүүдийг эх, эцэг, ах, дүүс, асран хамгаалагчынх нь хамт “Анкор” төвд урин хүүхэд тус бүрийн эмчилгээ, сувилгаа, асаргааны зардалд зориулан мөнгөн дэмжлэг үзүүлэх батламж, гарын бэлэг гардуулж өгсөнд зорилтот бүлгийн хүүхдүүдийн ар гэрийнхэн талархалтай байв.

Энэ үеэр Чингэлтэй дүүргийн ерөнхий боловсролын сургуулийн авьяаслаг сурагчдын төлөөлөл үе тэнгийнхэндээ урлагийн тоглолтоор бэлэг барьсан юм.

Чингэлтэй дүүргийн удирдлагууд зорилтот бүлгийн 88 хүүхдэд буцалтгүй тусламж үзүүлэв