Шадар сайд Төв аймгийн анхны хүндэт иргэн боллоо
УИХ-ын гишүүн, Монгол Улсын шадар сайд М.Энхболд
2009.02.23

Шадар сайд Төв аймгийн анхны хүндэт иргэн боллоо

УИХ-ын гишүүн, Монгол улсын Шадар сайд М.Энхболд Төв аймгийн анхны хүндэт иргэн болсон байна. Тус аймгийн Баян сумын уугуул тэрээр нийслэлийн засаг дарга, Монгол улсын Ерөнхий сайд, Шадар сайдаар ажиллах хугацаандаа аймаг орон нутгаа хөгжүүлэхэд үнэтэй хувь нэмэр оруулсан гэж нутгийн төр, захиргааны байгууллага үзэж ийнхүү өргөмжилжээ. Шадар сайд М.Энхболд байгаль цаг уурын хүндрэл учирч байсан он жилүүдэд аймгийн малчид, иргэдэд туслах хөдөлгөөнийг хотын дарга байхдаа өрнүүлж, нийслэлчүүд төдийгүй төр, засгийн анхаарлыг хандуулан их хэмжээний өвс тэжээл, хүнсний туслалцааг удаа дараа үзүүлж байсан юм.

Мөн Төв аймагт ирж, очиж байгаа хүмүүсийн тухлах дуртай “Одонт өндөрлөг”, аймгийн тохижолтод нэн шаардлагатай байсан “Алаг хавтан”-гийн үйлдвэр байгуулж, Зуунмод хотын дулааны магистраль, цэвэр усны шугамыг шинэчлүүлжээ. Үүний зэрэгцээ өнгөрсөн он жилүүдэд төрийн албан хаагчдын болон бага, дунд орлоготой иргэдийн орон сууц бариулж ашиглалтад хүлээлгэн өгсөн байна. Улаанбаатар- Эрдэнэсант сумын засмал замын шинэчлэл, 10 гаруй сумын иргэд үүрэн телефоны  хэрэглэгч болж, Сэргэлэн сумын нутаг, Хөшигийн  олон улсын нисэх онгоцны буудал барих, аймгийн төвд мянган хүний суудалтай спорт урлагийн цогцолбор байгуулах ажил Шадар сайд М.Энхболдын санаачлагатай холбоотой аж.

Мөн Төв аймгийн Бүрэн, Баян сумын сүсэгтэн олны хүсэлтээр хийд байгуулж, олон улсын байгууллагатай хамтран эрүүл мэндийн салбар, иргэдэд тусламж үйлчилгээ үзүүлж байгаа зэрэг олон ажлыг дурьдаж болно. Нутаг орондоо хийж бүтээсэн, санаачилж эхлүүлсэн ажлыг нь ийнхүү үнэлж байгаад Шадар сайд талархаад  бүтээн байгуулалтын чиглэлээр, ялангуяа сая гаруй хүн амтай нийслэл хотын ар тал байсаар ирсэн Төв аймгийнхаа хөгжлийн төлөө чадах бүхнээ хийх болно гэж хэлсэн байна.

0ЭКСПЕРТсэтгэгдэл
Сэтгэгдэл оруулахын тулд та хэрэглэгчийн эрхээр нэвтэрнэ үү.
Экспертүүдийн сэтгэгдэл
Одоогоор сэтгэгдэл нэмэгдээгүй байна.