Ажлын хэсэг хуралдав
2015.06.30

Ажлын хэсэг хуралдав

УИХ-ын гишүүн Г.Батхүүгээр ахлуулсан Үйлдвэрлэлийг дэмжих тухай хууль болон Хяналтын тухай хуулийн Ажлын хэсэг өчигдөр хуралдлаа.

Манай улсын эдийн засаг сүүлийн жилүүдэд уул уурхайн салбараас хамааралтай болсон. Тиймээс олон тулгуурт эдийн засгийг хөгжүүлэх шаардлага зүй ёсных.

Өөрөөр хэлбэл, хөдөө аж ахуй, уул уурхайн түүхий эдийн нөөцийг эргэлтэд оруулж, экспортод чиглэсэн, импортыг орлох, өрсөлдөх чадвартай, үнэ цэнэ шингэсэн, байгаль орчинд ээлтэй бүтээгдэхүүний үйлдвэрлэлийг төрөөс дэмжин хөгжүүлэх зорилгоор Үйлдвэрлэлийг дэмжих тухай хуулийн төслийг боловсруулжээ.

Хуулийн төсөлд экспортын чиг баримжаатай үндэсний үйлдвэрт технологийн шинэчлэл хийсэн хөрөнгө оруулалтын 50 хувьтай тэнцэх хэмжээний хөнгөлөлттэй зээлийг төрөөс 10 жилийн хугацаатай нэг удаа олгох; өндөр үр ашиг бүхий дэвшилтэд технологи болон өндөр технологи нэвтрүүлж нутагшуулсан, экспортын үйлдвэрийн эхний бүтээгдэхүүн үйлдвэрлэх хүртэлх хугацаанд судалгаа, хөгжилд зарцуулсан зардлын 75 хувь хүртэлх хэмжээтэй тэнцэх дэмжлэгийг улсын төсвөөс нэг удаа үйлдвэрт буцааж олгох зэрэг тодорхой заалтууд тусгасан байна.

Хяналтын тухай хуулийн хувьд олон нийт хүсэн хүлээж байгаа хуулийн төсөл.

Мэргэжлийн хяналтын байгууллагыг хүний амь нас, эрүүл мэнд, амьдрах орчин, хүнсний аюулгүй байдлыг хангах үүрэг бүхий Нийтийн аюулгүй байдлын хяналтын байгууллага болгон өөрчлөн зохион байгуулах, мөн бизнес эрхлэгчдийн нийтлэг эрх ашгийг хамгаалах, түүнийг хангах эрх зүйн орчныг бий болгох зорилгоор Хяналтын тухай хуулийн төслийг боловсруулж батлуулах нь зүйтэй гэж төсөл санаачлагчид үзэж буй. Уг хуулийг баталснаар бизнес эрхлэгчид болон иргэдэд хяналт, шалгалтын улмаас учирч буй дарамтыг хөнгөвчлөн, хуулийн зохицуулалт, хяналттай болгож, үйлчлүүлэгчиддээ мэргэжлийн зөвлөгөө, туслалцаа үзүүлдэг, буруу зүйл хийхээс нь хамгаалан сэрэмжлүүлдэг, гаргасан алдаа, зөрчлийн шалтгааны уг үндсийг таслан зогсоож, арилгахын төлөө эрсдэлтэй аж ахуйн нэгжүүдтэй хуулийн хүрээнд хамтран ажилладаг хяналтын шинэ тогтолцоог бий болгох юм.

Энэ өдөр мөн Замын хөдөлгөөний аюулгүй байдлын тухай хуулийн төслийн Ажлын хэсэг хуралдсан юм. Өнөөдөр замын хөдөлгөөний нөхцөл байдал үндэсний аюулгүй байдалд нөлөөлөх хэмжээнд хүрсэн. Зөвхөн өнгөрсөн онд 500 гаруй, энэ оны эхний таван сард ослын улмаас 140 гаруй хүн амиа алдсан нь үүний дохио. Замын хөдөлгөөний аюулгүй байдлын тухай хуулийн төслийг УИХ-ын гишүүн Г.Батхүү нарын найман гишүүн санаачилж өргөн барьсан бөгөөд замын хөдөлгөөний аюулгүй байдлыг хангах нэгдсэн тогтолцоо бүрдүүлэх хууль эрх зүйн зохицуулалтыг тусгажээ. Эдгээр хуулийн төслийг хаврын чуулганаар батлуулах хуваарьтай.

Харин өнөөдөр “Эдийн засгийн хүндрэлээс гарах арга хэмжээний хөтөлбөр батлах тухай” УИХ-ын тогтоолын хэрэгжилтэд хяналт тавих чиг үүрэг бүхий Ажлын хэсэг хуралдлаа. УИХ-ын гишүүн Г.Батхүүгийн ахалсан Ажлын хэсэг хөрөнгө оруулагчдын итгэлийг сэргээх, гадаадын хөрөнгө оруулалтыг нэмэгдүүлэх чиглэлээр ажиллаж байгаа юм.