УИХ-ын гишүүн Я.Содбаатар “АН-ынхан бидэнд хугацаа өглөө гэж ярьжээ. Гэтэл хэнд хугацаа өгөөд байгаа нь ойлгомжгүй. Яагаад гэхээр бид асуудлыг гацаагаад байсан зүйлгүй. АН-ынхан доторхи зөрчлөөсөө болоод маргалдаад байгаа юм шүү дээ.

Тэгэхээр АН-ынхан дотроо, бие биедээ л хугацаа өгч байгаа байх. УИХ дахь ларламөнтад суудалтай намууд энэ удаад хамтарч засаг байгуулсан. Улс орны нийгэм, эдийн засгийн байдал амаргүй байгаагаас хамтарч томхон асуудлаа шийдье гэж нэгдсэн. Тухайлбал, Үндсэн хууль, Улс төрийн намын хууль, Сонгуулийн хууль гээд томхон хуулиуддаа өөрчлөлт оруулъя.

Оюутолгой, Тавантолгойгоо өнөөгийн хүрсэн төвшнөөс нь ахиулж, гэрээ хэлцлийг нь шинэчилье. Ажлын байр бий болгож, валютын ханшийг буулгах чиглэлээр дорвитой арга хэмжээ авъя гэдэг зорилгоор л хамтарсан засаг байгуулсан. Үүнээс хойшхи хугацаанд санаж бодсон зүйл хэрэгжээгүй байна. АН үүн дээр нэлээд шүүмжлэлтэй хандаж байгаа гэж ойлгосон.

Бид ч гэсэн энэ гэрээнии хэрэгжилтийг эргэж харъя гэж байгаа. Үнэхээр гэрээнд байгаа ажлуудыг аль нам нь илүү гацааж, хориг тавьж байна гэдгийг бид эргэж харах ёстой. Яг ингээд харахаар Тавантолгой, Оюутолгой, Үндсэн хууль, Сонгуулийн хууль, эрчим хүчний томоохон төслийн ажлын хэсгийг бүгдийг нь АН-ын гишүүд удирдаж байгаа. Нэг ёсондоо гол ажлын хэсгийг өөрсдөө ахалж байж чуулган руу яагаад оруулж ирэхгүй, асуудлыг шийдэхгүй байна вэ гэдэг асуудлыг тавих цаг болсон.

Бид засагт анх орохдоо ч хэлсэн “Асуудал буруу тийш эргэвэл, болж бүтэхгүй бол шүүмжлэхээ шүүмжилнэ. Аль ч нам байсан парламентын гишүүн шүүмжилмээр асуудалд дуу хоолойгоо хүргэнэ. Харин зөвийг нь дэмжинэ гэсэн. Энэ үүднээс улс орны амин чухал асуудлыг харин АН-ын бүлэг өөрсдөө унагаж байна гэж бид харж байгаа. Өөрөөр хэлбэл, гэрт амгалан бол гадааг товхинуулахад амархан” гэдэгчлэн АН эхлээд дотроо учраа олох ёстой. УИХ-ын дарга нь, Ерөнхий сайд нь, тэр олон фракц, бүлэглэл нь учраа олчихвол улс оронд нэн тустай байна шүү дээ.

АН-ынхан өөрсдөдөө л хугацаа өгч байгаа байх