Өндөр гэгээн Г.Занабазарын мэлмий гийсний 380 жилийн ойн даншиг наадмыг зохион байгуулах Үндэсний хорооноос мэдээлэл хийлээ. 

Өвөрхангай аймгийн Хархорин суманд Энэ сарын 24-26-нд Өндөр гэгээн Г.Занабазарын мэлмий гийсний 380 жилийн ойн даншиг наадмыг зохион байгуулахаар болсон байна.

Даншиг наадам энэ 24-ны өдөр эрлийз гурван насны морины уралдаанаар эхлэх бөгөөд 25-ны өглөө наадмын нээлт албан ёсоор эхэлж, 512 бөхийн барилдаан болох аж.

Тус ойг тэмдэглэн өнгөрүүлэхэд улсын төсвөөс 500 орчим сая төгрөг төсөвлөсөн бөгөөд Өвөрхангай аймгийн төсвөөс 100 орчим сая төгрөг гаргахаар болсон байна. Үүнээс 149 сая төгрөгийг бай шагналд төлөвлөжээ.

Наадмын бөхийг УИХ-ын гишүүн Я.Содбаатар, урлаг соёлын арга хэмжээг Төрийн соёрхолт Н.Жанцонноров, шашины үйлтэй холбоотой арга хэмжээг УИХ-ын гишүүн Д.Лүндээжанцан, морины уралдааныг Өвөрхангай аймгийн "Аравгар хээр" холбоо хариуцан ажиллаж байгаа аж.

Ойн хүрээнд олон улсын эрдэм шинжилгээний хурал, Өндөр гэгээн Г.Занабазарын төрсөн нутгаар аялах, үйл ажиллагаа явуулж байсан хийд, сүм дугануудыг сэргээх, шинэчлэх ажил хийгдэж байгаа аж.

Зохион байгуулагчдаас дараах асуултад хариулт авлаа.

- Наадмаас гадна Өндөр гэгээн Занабазарыг сурталчилах ямар ажлууд хийгдэх вэ?

- Ойг тэмдэглэх ажлын хүрээнд Өндөр гэгээн Занабазарын уран бүтээл, шашны зан үйлийн талаар телевизийн дөрвөн ангит нэвтрүүлэг хийсэн.

Наадмын үеэр Эрдэнэ Зуу хийдийн музейд Улаанбаатар хотоос Өндөр гэгээн Занабазарын үзвэрүүдийг олон нийтэд сонирхуулна.  Долоодугаар сарын 24-нд шашны том цэнгүүнийг зохион байгуулна. Үүгээрээ Өндөр гэгээн Занабазар шашин төрд ямар гавъяа байгуулсныг сурталчилах юм.

- Даншиг наадамд л 500 сая төгрөг зарцуулах юм уу?

-Өндөр гэгээнийг алдаршуулах, сурталчилах ажилд хөрөнгө мөнгө зарцуулагдсан. Өөрөөр хэлбэл, он гараад Өндөр гэгээний мэлий гийсэн ойг тэмдэглэн өнгөрүүлэх хүрээнд зохион байгуулагдсан бүх ажлын санхүүжилт энэ мөнгөнд багтаж байгаа. Түрүү бөх болон моринд найман сая төгрөгийн мөнгөн шагнал гардуулна.

Дашрамд сонирхуулахад, тус даншиг наадмын үеэр буюу долоодугаар сарын 25-нд Монгол айргийг НҮБ-ын соёлын өвд бүртгүүлэх арга хэмжээ болох юм байна.