Тэр бол Баянхонгор аймагт төрсөн ч Дархан хотын суугуул, айлын ууган хүү. Түүнийг ард түмэн Сайнхүүгийн Ганбаатар гэхээс илүүтэйгээр “Фенг шүй” болон Үйлдвэрчний эвлэлийн Ганбаа гэдгээр нь андахгүй.

2008 оны сонгуулийн өмнө Монголын үйлдвэрчний эвлэлийн холбооны Ерөнхийлөгчөөр ажилласан тэрээр энэ байгууллагыг ёстой л ард түмэнд үнэхээр хэрэгтэй гэдгийг нь ойлгуулж чадсан.

Хөхөө өвлийн хүйтнээр талбайд жагсаал хийн “Цалин, тэтгэврийг нэмэх хэрэгтэй” хэмээн ард түмний дуу хоолой болж байсан. Тиймдээ ч энэ л эрч хүчээрээ Дархан-Уул аймагт бие даан нэр дэвшиж 53,79 хувийн саналаар үнэмлэхүй ялалт байгуулсан.

Энэ үеэс л эхлэн түүнийг Сайнхүүгийн Ганбаатар нэрээр нь иргэд овоглох болсон. Учир нь сонгуулийн сурталчилгааныхаа үеэр “Сайн хүү” гэдэг дууг шинэхэн мэндэлсэн хип хоп хамтлагаар дуулуулж, клипэнд нь өөрөө тоглоод амжсан. Дууны үгэнд “Сайн хүүгийн сэтгэл ГАН төмөр мэт бат бэх, БААТАР мэт зоригтой байх болтугай” хэмээн дуулжээ. Ингэж аавынхаа Сайнхүү гэдэг нэрийг өөрийнхтэйгөө хамт дуунд мөнхөлжээ.

С.Ганбаатар гишүүн зоригтой шийдмэг үйлдлүүдээрээ олны анхаарлыг татдаг нэгэн. Ямар сайндаа л УИХ-ын гишүүдийн тангараг өргөх ёслолын үеэр ганцаараа зангиагүй ирж “Тангарга өргөх ёслол дээрээ зангиагүй ирлээ, танхай гишүүн болох нь дээ” гэж жиг жуг ярилцаж ордны ажилчдын амыг халааж байлаа.

Түүнчлэн УИХ-ын хуралдааны танхимд үг хэлэхдээ 76 хүнээс ганцаархнаа л босож үг хэлдэгээс болж түүнийг “Босоо Ганбаа” гэж хочлох болсон. Хэдий эргэн тойронд нь ажиллаж байгаа хүмүүс түүнийг эдгээр үйлдлүүдийг ундууцан хүлээж авдаг ч ард түмэнд бол тийм биш. Тэрээр нэгэнтээ “УИХ-ын гишүүнийг Хамгийн ухаантай мэдлэгтэй гэж сонгоогүй, Хамгийн итгэл даагаарай гэж сонгосон юм” хэмээн хэлж сошиал ертөнцийг шуугиулсан.

Өөр бас тэрээр “Хүн ойлгомжгүй, маш ухаантай царайлаад ярьж л байвал тэр ухаантай ярианы цаана нь луйвар нуугдаж байдаг” гэж хэлсэн. Энэ мэтээр тэрээр өөрийн гэсэн онц мэргэн үгсийн сангаа нэмэгдүүлсээр. Түүнийг сүүлийн үед “Популист” гэх болсон. Гэвч тэрээр “Тийм ээ, би популизм хийдэг” хэмээн ам бардам ярилцлага өгч байлаа.

“Үнэнээр явбал үхэр тэргээр туулай гүйцдэг гэдэг л энэ юм болов уу. Ер нь үнэнээрээ л яваад байвал үхэр тэргээр ч гэсэн туулайг гүйцэж болдог байна. Зүйрэлбэл, би Архангай аймгаас үхэр тэрэг хөлөглөөд Улаанбаатар руу гарчээ. Туулай ч надтай зэрэгцээд гарлаа. Тэр намайг бодвол асар хурдтай явж байгаа. Гэхдээ би зам мөрөөсөө хазайлгүй явсаар гурван сарын дараа хотод орж ирэхэд туулай байсангүй. Бодвол хаа нэг газар асар хурдтай давхиж л яваа биз.

Гол нь тэр зорьсон газраа очсонгүй” хэмээн хэлж өөрийг нь шүүмжлэгчдэд хариуг нь барьж амийг нь тагласан. Түүний энэ мэтчилэн хэлэх ухаан мэргэн үгс нь одоог хүртэл ард түмнийг татсаар байгаа. Мөн өөрийг нь популист гэж хэлсэн нөхдүүдэд хандаж “Оюутолгой дээр 10.000 ажлын байр бий болгоно.

ДНБ-ий 30 хувийг Оюутолгойгоос ханган нийлүүлнэ гэж ярьж байсан нь өөрөө популист амлалт шүү дээ. Түүнээс биш үүнийг нь ажил хэрэг болгох гэж, Оюутолгойн гэрээний хаана нь энэ бүхнийг оруулсан юм. Цагаан дээр хараар юу гэж бичсэнийг асуух нь эрүүл зүйл” гэж хэлэн бас ам асууж байлаа.

Гэхдээ ганц зүйл нэмээд хэлэхэд Оюунтолгойн гэрээ зурагдаад удаагүй байхад С.Ганбаатар Сангийн сайд С.Баярцогтыг телевизийн халз мэтгэлцээнд дуудаж өөрийн олсон гэрээний зөрчилтэй заалтуудыг хэлсэн ч ганц дайчин ганцаарддагийн үлгэр болсон.

Гэтэл одоо эргээд харахад түүний зөв байсан гэдгийг эдийн засагчид хэлж байгаа. Үнэхээр л сайн гэрээ болсон бол одоог хүртэл ингэтлээ сунжралгүйгээр улсад ашигаа өөх ёстой гэдгийг хэн хүнгүй ойлгохоор болсон. Эндээс дүгнэвэл тэр зөвхөн ард түмэнд таалагдахын тулд бус харин үнэнийг ярьдаг гэдгийг мэдэж болно. Хэрвээ одоо ч гэсэн эрхэм гишүүн цаас барьчихаад камерны өмнө хоолойгоо сөөн барин ярьж байгаа бол үгийг нь заавал ч үгүй сонсох хэрэгтэй болж байна даа.

Хүмүүсийг хайрлахын тулд гишүүн болсон төрийн түшээ