Хаврын чуулганы гол дуулиант хуулийн нэг Казиногийн туха хууль байсан. Гэвч нэгхэн удаагийн хэлэлцүүлгийн дараагаар хуулийн тухай сураг ажиг намжсан. Харин ирэх Намрын чуулганы гол “фаворит” Казиногийн тухай хууль байх нь мэдээж.

Дотоодын эдийн засгийн өсөлтийг хангахад дэмжлэг үзүүлэх, хөрөнгө оруулалтыг нэмэгдүүлэх, ажлын байрыг шинээр бий болгох, аялал жуулчлалын салбарын хөгжлийг эрчимжүүлэх, үр ашгийг нэмэгдүүлэх зорилгоор казиногийн үйл ажиллагааг эрхлэх эрх зүйн орчныг бий болгох шаардлага тулгарч байгаа гэдгийг Засгийн газар үзэж байгаа.

Мэдээж эдийн засаг уул уурхайн олборлох салбараас хэт хамааралтай байгаа нь улс орны эдийн засгийн аюулгүй байдал, санхүүгийн чадавхид сөргөөр нөлөөлж, эдийн засгийн хямралд өртөх магадлалыг нэмэгдүүлж, дотоодын эдийн засгийн дархлааг сулруулах хандлага сүүлийн жилүүдэд ажиглагдаж байна.

Бид аялал жуулчлалын өрсөлдөх чадварын үзүүлэлтээр дэлхийн 140 орноос 99, Ази, номхон далайн 25 орноос 19-д эрэмбэлэгдсэн бөгөөд 2013 онд Монгол Улсад нийт 417.0 мянга гаруй жуулчин аялж, энэ салбарын орлого 263.0 сая ам.долларт хүрч, аялал жуулчлалын салбарын орлого дотоодын нийт бүтээгдэхүүний 5.29 хувийг бүрдүүлэх болсон.

Гэхдээ энэ тоо дараа жил илт багасна гэдэгт би эргэлзэхгүй байгаа. Учир нь энэ жилийн наадам жуулчдын хувьд хар дарсан зүүд мэт байсан биз. Гэхдээ энд ярьж байгаа зүйл энэ биш.

Харин Засгийн газрын зүгээс Аялал жуулчлалын салбарын хөгжлийг хязгаарлаж байгаа асуудлыг шийдвэрлэж, олон улсад өрсөлдөх чадварыг дээшлүүлснээр 2020 он гэхэд дотоодын нийт бүтээгдэхүүний 14 орчим хувийг бүрдүүлэх, жуулчны тоог 1.0 саяд хүргэх зэрэг зорилт тавьж байна. Иймээс энэ салбарын хөгжлийг эрчимжүүлэх, валютын орох урсгалыг нэмэгдүүлэх чиглэлээр казиногийн үйл ажиллагааны эрх зүйн орчныг бүрдүүлж, цаашид хөгжүүлэх шаардлагатай юм.

Дээрх эрэлт хэрэгцээ, шаардлагыг үндэслэн олон улсын стандартад нийцсэн казиногийн үйл ажиллагааг эрхлэхтэй холбогдсон харилцааг зохицуулах, зохих ёсны хязгаарлалттайгаар зөвшөөрөх, төрийн зүгээс тавих хяналтын тогтолцоо, арга механизмыг тодорхой болгох зорилгоор Казиногийн тухай хуулийн төслийг Монгол Улсын Үндсэн хууль болон холбогдох бусад хууль тогтоомжид нийцүүлэн, мөн 1998-1999 онд УИХ-аас баталж, хүчингүй болгосон Казиногийн хууль, 2003-2004 онд мөрийтэй тоглоомын үйл ажиллагааг түр хугацаанд зөвшөөрч явуулсан туршлага, алдаа дутагдалд дүгнэлт хийж, зарим улс орнуудын казиногийн эрх зүйн орчин, олон улсын туршлагыг судалсны үндсэн дээр үндэсний онцлогт тохируулан боловсруулж УИХ-д өргөн барьсан.

Хуулийн хамгийн онцлох нэг заалт нь Монгол Улсын иргэн казинод тоглохгүй байхаар тусгагджээ.

Хэрвээ хууль батлагдвал казиногийн үйл ажиллагаа хуулинд заасан нөхцөл, шаардлагын дагуу явагдаж, казиногийн үйл ажиллагаанд төрөөс хяналт тавих эрх зүйн орчин бүрдэх төдийгүй энэ төрлийн үйл ажиллагаанаас олох татварын орлого нэмэгдэж, аялал жуулчлалын салбарын хөгжил эрчимжиж, үүнийг дагасан худалдаа, үйлчилгээ, ажлын байр нэмэгдэн улс орны эдийн засгийн хөгжилд зохих хувь нэмрээ оруулна хэмээн ажлын хэсгийнхэн үзжээ. Гэхдээ уг хуулийн ирээдүй хаашаа эргэх нь ирэх намрын чуулганаар шийдэгдэнэ.

Магадгүй хуулийн төслийг эргүүлэн татаж болно. Учир нь нийгмийн хэмжээнд Казино гэх ойлголт ихэнхдээ буруугаар ойлгогдож байгаа тул сонгуулийн өмнөхөн ийм төрлийн хуулинд оролцож өөрийн нэрэнд сэв суулгахыг хэн ч хүсэхгүй биз. Гэхдээ юу болохыг зөвхөн цаг хугацаа л харуулна даа.

Намрын чуулганы онцлох хууль “Казино”