УИХ-ын ээлжит бус чуулганыг наймдугаар сарын 3-нд зарлана гэж УИХ-ын дарга З.Энхболд хаврын чуулганы хаалтын үгэндээ хэлсэн. Гэвч өнөөдрийн байдлаар УИХ-ын даргын захирамж гараагүй байна.

Монгол Улсын УИХ-ын тухай хуулийн 16 дугаар заалтад чуулган хуралдах өдөр, цаг хугацаа, товыг зарласан захирамжийг УИХ-ын дарга гаргаснаар албан ёсны болдог тухай заасан байна.
УИХ-ын дарга З.Энхболд ээлжийн амралтаа аваагүй, ажиллаж байгаа бөгөөд өнөөдөр Өндөр гэгээн Занабазарын мэндэлсний 380 жилийн ойн баярт оролцохоор Өвөрхангай аймгийг зорьжээ.
УИХ-ын ээлжит бус чуулган дээрх өдөр болох, эсэхийг УИХ-ын Хэвлэл мэдээлэл, олон нийттэй харилцах хэлтсийн дарга О.Батхандаас тодруулахад, УИХ-ын даргын захирамж гараагүй байгаа боловч УИХ-ын Тамгын газар ээлжит бус чуулган товлосон өдрөө болно хэмээн тооцож, бэлтгэлээ хангаж байна.

Ээлжит бус чуулганаар Эдийн засгийн ил тод байдлын тухай хууль, Эрүүгийн хууль, Зөрчлийн тухай хууль, Засгийн газрын гишүүдийг томилох, огцруулах тухай асуудлыг хэлэлцэнэ хэмээн УИХ-ын дарга хаврын чуулганы хаалтын үеэр хэлсэн.

Эдгээр хуулийн төслийг чуулганы нэгдсэн хуралдаанд бэлтгэх байнгын хорооны Ажлын албад Төрийн ордонд хуралдаж байгаа. Хууль зүйн байнгын хорооны дарга Д.Ганбат, Төрийн байгуулалтын байнгын хорооны дарга А.Бакей болон УИХ-ын 20 гаруй гишүүн тогтмол ажиллаж байна” гэсэн тайлбар өглөө.