“Шударга ёс” эвслийн бүлгийн дарга Н.Батцэрэг, дэд дарга З.Баянсэлэнгэ нар мэдээлэл хийлээ.

Тус эвслийн бүлэг прокурорын байгууллагын 85 жилийн ойд оролцсон Ерөнхийлөгчийн хэлсэн үгэнд анализ хийж, Өршөөлийн хуульд бүхэлд нь хориг тавьсанд харамсч буйгаа илэрхийлж, мэдэгдэл гаргасан байна. 

Мөн Засгийн газар сайд нарын нэрээ өргөн барихад “Шударга ёс” эвсэл хаалт хийгээгүй гэдгээ мэдэгдсэн юм. “АН өөрт оногдсон квот дээрээ сайдаа тохирч чадахгүй байгаа гэх мэдээлэлтэй байгаа. Сайдаар дамжуулж асуудлыг гацаах, барьцаа хийх сонирхолгүй байгаа” хэмээн бүлгийн дарга байр сууриа илэрхийллээ.

УИХ-ын гишүүн З.Баянсэлэнгэ  сэтгүүлчдийн асуултад хариулав.

-Өршөөлийн хуульд Ерөнхийлөгч 4.1, 7 дугаар зүйл хэмээн хэсэгчлэн хориг тавьсан. Танай бүлэг яагаад бүхэлд нь хориг тавьсан гэж үзэж байна вэ?

-Ерөнхийлөгч энэ хуульд хэсэгчлэн хориг тавиагүй. Хоригийг тавихдаа хуулийн зүйл заалтаар 4.1 буюу 7 зүйлд хориг тавьсан. Энэ нь хэсэгчилж тавьж байгаа мэт харагдуулж байгаа юм. 4.1, 7 зүйлд хориг тавьж байгаа нь Өршөөлийн хуулийн гол амин сүнс буюу зүрхийг нь сугалаад авчихаж байна.

Энэ хоригийг хүлээгээд авчихвал Өршөөлийн хуулийг хэрэгжүүлэх боломжгүй болж байгаа юм. 4.1-т хорих газар ял эдэлж байгаа хөнгөн, хүндэвтэр, хүнд, онц хүнд бүх төрлийн гэмт хэрэгтнүүдийн асуудал багтсан. Хорих газраас суллагдах хүмүүсийн асуудал 4.1 дотор байгаа. 7 дугаар заалт бол мөрдөн байцаалтын шатанд яваа хавтаст хэрэг үүсгэсэн хүмүүсийн асуудал. Энэ хоёр заалтыг аваад хаячихаар хорих газраас хүн суллагдахгүй, мөрдөн байцаалт, хэрэг бүртгэл, шүүх, прокурорын шатнаас хүмүүс өршөөгдөхгүй.

Харин хорихоос өөр төрлийн хөнгөн ялтай торгосон, баривчилсан, үйл ажиллагаа, эрхийг нь хязгаарласан хүмүүсийн асуудал өршөөлд хамрагдана. Захиргааны зөрчил шийтгэлтэй холбоотой өршөөлийн асуудал хамрагдана.

Хорих газарт маш олон хүн өршөөлд хамрагдахаар хүлээгдэж байгаа. Дээр нь мөрдөн байцаалтын шатанд явж байгаа хүмүүсийн асуудал өршөөлд тусгагдсан. Хэрвээ хоригийг хүлээгээд авбал бид  Ерөнхийлөгчийн алдаатай бодлогыг дэмжсэн болно. Өршөөлийн хуулийг улс төржүүлж, ард түмнээ хагаралдуулах шаардлага юунд байна вэ?

Үүний ард Тавантолгойн асуудал нуугдаж байна. Ерөнхийлөгч хуулиа зөрчлөө. Үндсэн хуулиар олгогдсон бүрэн эрхийн хүрээнд засаглал хоорондын хамтын ажиллагаан дээр хориг тавих асуудал явж байгаа. Үндсэн хуулийг хэрэгжүүлэх үүднээс хориг тавигддаг гэж судлаачид үзсэн. Хориг хэсэгчилж тавьсан гэж байгаа боловч бүхэлд нь тавьчихаад хууль тогтоох байгууллагын эрх мэдэлд халдаж байна.