Монголын сургуулийн өмнөх хувийн хэвшлийн холбооноос сайн үйлсийн аян эхлүүлж, нийслэлийн Ерөнхий боловсрол сургуулиудад ажилладаг 3000 багш нарын 3000 хүүхдийг хувийн цэцэрлэгүүдэд тусгай бүлэг гаргаж, үнэгүй явуулъя гэсэн саналыг Боловсрол соёл шинжлэх ухааны яаманд тавьжээ.

3000 хүүхдийн нэг жилийн сургалтын төлбөр нийлээд зургаан тэрбум төгрөг болно. Ингээд тооцохоор зургаан тэрбум төгрөгийн хандивыг хувийн хэвшлийнхэн боловсролын салбарт зориулж буй юм.

3000 хүүхдийг цэцэрлэгт үнэгүй хамруулахын тулд улсад 100 хүүхдийн багтаамжтай 30 цэцэрлэг шаардлагатай. Нэг цэцэрлэг барих зардал нэг тэрбум гэж тооцвол 30 тэрбум төгрөгийн хөрөнгө оруулалт хэрэгтэй болох юм. Тэгвэл дээрх 30 тэрбум төгрөгийн хэмнэлтийг, үйл ажиллагааны зардалтай нь нийлүүлээд хувийн хэвшлийнхэн гаргахаар шийджээ.

зургийг news.mn

 Одоо хамгийн гол нь нийслэлийн Боловсролын газар, салбарын яам нь хэн гэдэг багшийн хэдэн настай хүүхдийг дээрх хөтөлбөрт хамруулах вэ, хүүхдийг сонгохдоо багш нарт ямар шалгуур тавих уу?, эцэг эхийн харъяалал, ажлын байрны байршлаар нь ялгаж, ангилан ойролцоох хувийн цэцэрлэгт хүүхдүүдийг нь өгөх үү? зэрэг зохион байгуулалтын нарийн судалгаа, тооцооллын ажлыг яаралтай хийх шаардлагатай байна.

2015-2016 оны хичээлийн жилд цэцэрлэг хүрэлцэхгүйн улмаас 27 мянган хүүхэд цэцэрлэггүй хоцорхоор байсан юм. Харин дээрх шийдвэр гарснаар ядаж 3000 хүүхэд сургуулийн өмнөх боловсролд хамрагдах эрхтэй болж байна. Гэхдээ ирэх есдүгээр сарын 1-нээс өмнө амжиж багш нарын хүүхдийг бүртгэж амжихгүй гэдгээ нийслэлийн Боловсролын газраас мэдэгдлээ. Ямартай ч есөн сардаа багтаж, 3000 багшийн 3000 хүүхэд нийслэл дахь 318 хувийн цэцэрлэгт хуваагдан явж эхэлнэ. Улаанбаатар хотын төрийн өмчит сургуульд нийт 12 мянга орчим багш ажилладаг аж.