Нийтийн тээврийн үйлчилгээ эрхлэгч аж ахуй нэгжүүдийн нийслэлийн удирдлагуудад хүргүүлсэн шаардлагад хувийн хэвшлийг шахаж өмчийн ялгавар гаргаж байгаа Зорчигч тээврийн нэгтгэлийн ОНӨААТҮГ-ын захирал Ц.Одонтунгалагийг огцруулахыг шаардаж байгаа тухай бичсэн байсан.

Энэ тухай болон Зорчигч тээврийн нэгтгэлийн шинэчлэлд хэрхэн дасан зохицож байгаа тухай Ц.Одонтунгалагаас тодруулав.

-Танай ажил хэвийн явагдаж байна уу?

-Ажил хэвийн явагдаж байна. Байгууллагаас нэг ч хүн халагдаж, чөлөөлөгдөөгүй.Ажилчдаа хуучин ажлын байрнаас нь чөлөөлж, шинэ ажлын байран дээр нь хөдөлмөрийн гэрээ байгуулаад явж байна. Өөрөөр хэлбэл кондукторын ажлаас нь чөлөөлж шалгагч, мөнгө тоологч, угаалга цэвэрлэгээний ажилтан гэх ажлын байруудад шилжүүлж байгаа. Хуулийн дагуу хөдөлмөрийн гэрээг шинэчлэн байгуулах ёстой.

-Ажилчдыг халаагүй гэсэн үг үү. Таныг огцруулахыг шаардлагад дурдсан байсан.

-Хэн нэгнийг албадаж мэдэгдэл өгөөд чөлөөлсөн юм байхгүй. Дээр хэлсэн хөдөлмөрийн гэрээг шинэчлэхийн тулд хууичн ажлаас нь чөлөөлөх мэдэгдэл өгдөг. Гэхдээ “Ц.Одонтунгалаг захирал өндөр цалин өгье гэхээр зөвшөөрөхгүй байна гэж хэлвэл ажилчид чинь босоод ирнэ тийм учраас та нар тэмцээч” гэсэн байдлаар хүмүүсийг турхирсан байдал яригдаж байгаа. Шинэ системийг дэмжин ажиллаж байгаа төрийн компани хүчтэй байгаад бусад хувийн компаниудын орлого зарлага мөнгөн урсгал хяналтад орчих учраас эмзэглэж байгаа юм болов уу. Түүнээс биш энэ салбарыг хөгжүүлэхийн төлөө явж байгаа хүнд энэ систем бол зайлшгүй хэрэгтэй. Олон улсад ийм системд шилжсэн. Манайх мэтийн хэдэн оронд л мөнгө хураагчтай үлдсэн байсан шүү дээ.

-Шалгагчийг ажлын хэрхэн хүлээж авч байна вэ?

-Хяналт шалгалтын ажилтан, угаалга цэвэрлэгээний ажилтан, мөнгө тоологч гэх шинэ ажлын байрууд бий болгоод хөдөлмөрийн гэрээ байгуулаад явж байгаа. Олонх нь эндээ ажиллаж байна. Ганц, нэг хүн өөр өндөр цалинтай ажилд орно, ажлын байраа өөрчилнө гэсэн саналаар ажлаасаа чөлөөлөгдөж байна. Шинэ системд шилжээд орлого бага зэрэг буурсан ч бид нэг хүнийг ч ажлын байргүй үлдээхгүйн тулд ажлуудыг хуваарилаад явж байгаа.

-Кондукторуудын цалин өмнөхөөс буурна гэсэн үг үү?

-Өмнө нь үндсэн цалин нь 437 мянга байсан. Орлого сайн байвал шагнал цалин өгнө тэгэхээр хуучин шигээ авах боломжтой. Цалингийн журам нь өөрчлөгдөнө. Урамшууллын хэлбэрээр олгогдоно гэсэн үг.

Нэг ч кондукторыг халаагүй