Монгол Улсын Их Хурлын дарга Зандаахүүгийн Энхболд өнөөдөр /2015.09.12/ Монголын хүүхдийн спортын V их наадмын нээлтийн арга хэмжээнд оролцов.

Иргэдийн спортоор хичээллэх хүсэл сонирхлыг дэмжих зорилгоор дөрвөн жил тутамд зохион байгуулагддаг хүүхдийн спортын их наадмыг нээж хэлсэн үгэндээ Улсын Их Хурлын дарга “Монголын оддыг дэлхийд гаргах том алхамыг эхлүүлж байгаа Та бүхэнд Монгол Улсын Их Хурлын нэрийн өмнөөс болон хувиасаа чин сэтгэлийн халуун баяр хүргэе. Монгол Улс даяараа 8 хоногийн турш монголын спортын ирээдүйн алдартнууд болох өсвөрийн тамирчдынхаа биеийн тамир спортын гайхамшигт амжилтыг харж баясах сайхан боломж бүрдэж байна" гэлээ. Мөн тэрээр, тус арга хэмжээ нь Монгол Улсын Биеийн тамир, спортын түүхэнд хөгжлийн шинэ чиг хандлага, уур амьсгал, өнгө төрхийг бүрдүүлэх ажлын эхлэл болж байгааг онцлон тэмдэглэээд, нийт тамирчид, багш, дасгалжуулагч нарт спортын өндөр амжилт хүсэв.

Монголын хүүхдийн спортын V их наадам нь биеийн тамир, спортын тухай хуулийн 16.1, Бага, дунд боловсролын тухай хуулийн 18.3 дугаар заалт, Засгийн газрын 2014 оны “Хүүхдийн спортын наадам” зохион байгуулах тухай 359 дүгээр тогтоолыг хэрэгжүүлэх хүрээнд 09 дүгээр сарын 12-18-нд Улаанбаатар хотноо зохион байгуулах юм. Хүүхэд, өсвөр үеийнхнийг биеийн тамир, спортын арга хэмжээ, тэмцээн, наадамд өргөнөөр хамруулах, тэдэнд эр зориг, хамт олонч хүмүүжлийг төлөвшүүлэх, ур чадвартай тамирчдын залгамж халааг тодруулах, 2016 онд Сахагийн Олон улсын хүүхдийн спортын наадам, “Лиллехаммер-2016” Залуучуудын өвлийн олимпийн II наадамд оролцох тамирчин хүүхдүүдийг сонгон шалгаруулах зорилготойгоор явагдаж буй энэ наадамд оролцогсод байт харваа, бокс, волейбол, буудлага, гандбол, гимнастик, шатар, даам зэрэг спортын 17 төрлөөр өрсөлдөх юм.

Энэхүү наадамд нийт 21 аймаг, 9 дүүргийн 2500 гаруй тамирчин, 1000 гаруй багш, дасгалжуулагч, албаны зочид, төлөөлөгчид оролцож байгаа юм байна.

Монгол Улсад тив, дэлхийн хэмжээний наадам зохион байгуулах бэлтгэл ажлыг эхлүүлэх зорилгоор Монголын хүүхдийн спортын V их наадмыг олон улсын наадам, олимпийн жишгээр зохион байгууллаа.

Монголын хүүхдийн спортын V их наадмын нээлтэд Улсын Их Хурлын гишүүн, Монголын Хөнгөн атлетикийн холбооны ерөнхийлөгч Л .Болд, Эрүүл мэнд спортын дэд сайд, Монголын хүүхдийн спортын V их наадмыг зохион байгуулах хорооны дарга Т.Болдбаатар болон хүндэт зочид, албаны бусад хүмүүс оролцовхэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.