Баянгол дүүргийн хөгжил дэвшил, хойч үеийнхээ ирээдүйн сайн сайхны төлөө цуцалтгүй хөдөлмөрлөж, уйгагүй зүтгэж ирсэн үе үеийн ахмад буурлууд та бүхнийхээ энэ өдрийн амар амгаланг айлтган мэндчилье.

“Ахмадын баяр”-ыг манай улс 1992 оноос тэмдэглэж эхэлсэн бөгөөд өнөөдөр 23 дахь жилтэйгээ учран золгож байна.

Бид аливаа тэмдэглэлт ой, баярыг иргэдийн оролцоонд тулгуурлан, тэдний алдар гавъяаг мөнхжүүлэх, мөн бүтээн байгуулалтыг өрнүүлсэн олон үйл ажиллагааг зохион байгуулахаар хичээн ажиллаж байна.

Баянгол дүүргээс сонгогдсон шат шатны төлөөллүүд иргэдийнхээ, тэр дундаа ахмадуудынхаа хэрэгцээ, шаардлагад нийцсэн олон асуудлыг шийдвэрлэж, бодит ажил болгон хэрэгжүүлээд байна.

Энэ онд бид ахмад настны эрүүл мэндийг хамгаалах, тэдэнд үзүүлэх хөнгөлөлт, тусламж, халамж үйлчилгээг сайжруулах, өндөр настай хүн бүрт хүрч ажиллах зорилгоор “Ахмад настны нөхөн сэргээх эмчилгээ, сувиллын төв”, “Ахмадын хөгжлийн төв” зэрэг томоохон бүтээн байгуулалтын ажлыг эхлүүлээд байна.

Буянтай буурлууд та бүхнийг ажлын их туршлага, үнэт сургааль, мэдлэг, ёс уламжлалаа хүүхэд, залуустаа өвлүүлэн үлдээж, дүүргийнхээ хөгжил дэвшилд манлайлан оролцохыг уриалж байна.

Та бүхэнд Баянгол дүүргийн түүхт 50 жилийн ой, “Ахмадын баяр”-ын мэндийг дэвшүүлээд урт нас, удаан жаргалыг хүсэн ерөөе!

БАЯНГОЛ ДҮҮРГИЙН ИРГЭДИЙН ТӨЛӨӨЛӨГЧДИЙН ХУРЛЫН ДАРГА Д.ДЭЛГЭРБАТ

Мэндчилгээ