“Усны засаглал”-ыг хэлэлцэж байна
“Усны засаглал”-ыг хэлэлцэж байна
2015.10.13

“Усны засаглал”-ыг хэлэлцэж байна

Монгол Улсын Ерөнхийлөгчийн Тамгын газар, “Тогтвортой хөгжлийн боловсрол” төслөөс өнөөдөр Төрийн ордонд “Усны засаглал” нэгдсэн илтгэл сонсох арга хэмжээг зохион байгууллаа.

Уг арга хэмжээг Ерөнхийлөгчийн Тамгын газрын дарга П.Цагаан, БОНХАЖ-ын сайд Н.Батцэрэг нээж үг хэлсэн юм. Мөн үеэр салбарын мэргэжилтнүүд  “Монгол орны гадаргын усны нөөц, одоо ба ирээдүй”, “Усны засаглал”, “Ус ба тогтвортой хөгжил”, “Швейцарын хөгжлийн агентлаг-Монголд” зэрэг илтгэл тавьсан юм. БОНХАЖЯ-ны Газар зохион байгуулалт, усны нэгдсэн зохион байгуулалтын газрын  дарга Г.Мөнх-Эрдэм “Усны үнэ цэнэ” илтгэлдээ, “Монгол орон усны нөөцөөр хомс орны тоонд ордог.

Манай улсын усны нөөц 600 шоо км. Өнөөдөр бидний хэрэглэж байгаа хэрэглээ усны нөөцийнхөө 30-40 хувьд хүрсэн. Усны нөөц ялангуяа газрын доорх усны нөөц нөхөн сэлбэгдэх хугацаа олон зуун жилээр үргэлжилдэг. Бид тэр нөөцөөсөө хэрэглэдэг орон болж хувирч байна. Цаашид элбэг байдаг, нөхөн сэлбэгддэг, гадаргын усыг ашиглах бодлого руу төрийн бодлогыг чиглүүлэх шаардлагатай.

Мөн өнөөдөр манай улс хамгийн багаар усаа үнэлж байна. Үүнийг тодорхой хэмжээнд нэмэх хэрэгтэй. Ингэснээр усыг хэмнэдэг, эргүүлж ашигладаг, цэвэрлэдэг болоход аж ахуйн нэгжүүд анхаарч эхэлнэ. Нөгөөтэйгүүр говийн бүс дэх том төслүүдийг усаар хангах асуудал хамгийн чухалд яригдаж байна. Бид Орхон, Хэрлэн, Туул төслүүдийг нэн яаралтай эхлүүлэх ажлыг ирэх оноос зохион байгуулах ёстой” гэлээ.

Тогтвортой хөгжлийн үндсэн гурван тулгуур бол эдийн засаг, нийгэм, байгаль орчин. Эдгээр тулгуур нь аль талаараа ус, түүний нөөцтэй шууд утгаараа холбогддог. Өнгөрсөн жилүүдэд усны нөөцийн хомсдолын асуудал дэлхийн нийтийн анхаарлын төвд орж байнга яригдаж буй. Усны нөөц багатай орны хувьд манай улс харьцангуй эмзэг байдалд байгааг мэргэжлийн хүмүүс хэлж байна. Иймд тогтвортой хөгжлийн эх үндэс усны тухай асуудлаар судлаачид ийн илтгэлээ тавьж, үүндээ шавхагдаж буй цэвэр усны нөөцийн үр ашиггүй хэрэглээ, усны засаглалыг хэрхэн сайжруулах тухайд тус тусын саналыг дэвшүүлж байна.