Монгол инженерүүд J-800 маркийн автобусыг эх орондоо угсарч, үйлдвэрлэж эхэлсэн байна. Энэхүү автобус нь Монгол орны цаг уур болон орчинд тохирсон, галт тэрэгний хэлбэртэй, гагнамал металл хийцтэй, кузов хэсгийг дотооддоо бүрэн үйлдвэрлэсэн юм байна.

Мөн өвлийн улиралд цантдаггүй вакум цонх, нарнаас хамгаалах торон хөшиг, зааландаа зорчигчдын дулаан тохьтой байдлыг хангасан таван ширхэг печь, бүрэн камержуулсан заал, хийн системийн агаар хуурайшуулагч, цахилгаан тормос, тэргэнцэртэй иргэдэд зориулсан замын тавцан, бууж суухад хялбар хагас нам шал, өргөн цэлгэр хаалга, анхны тусламжийн хайрцаг гэх мэт жолооч, зорчигчдын тав тухыг хангасан давуу талтай гэдгийг “Экобус” ХХК-ийн инженерүүд онцолж байв.

“Экобус” ХХК-ийн гүйцэтгэх захирал А.Цэцэгмаа “Автомашин үйлдвэрлэлийн олон жилийн судалгаа, шинжилгээнд тулгуурлан, шат дараалсан ажлуудыг хийсний үндсэн дээр байгуулагдсан. Нийтийн тээвэр болон агаарын бохирдол улс орны хэмжээнд шийдвэрлэх асуудлуудын тоонд зүй ёсоор орж буй энэ үед “Экобус” ХХК Монголдоо автомашины үйлдвэр байгуулан, байгаль орчинд ээлтэй стандарт бүхий автобус үйлдвэрлэж байна” гэв.

Зохион бүтээгчдийн нэгдсэн холбооны ерөнхийлөгч Д.Жаргалсайхан “Манай инженерүүд энэхүү автобусныхаа мотороос бусдыг эх орондоо үйлдвэрлэх боломжтой. Нэг автобус үйлдвэрлэхэд цаана нь маш олон ажлын байр бий болно. “Экобус” ХХК жилдээ ийм төрлийн 100-120 автобус угсрах, үйлдвэрлэх боломжтой. Манай инженерүүд Монголдоо том оврын автобусыг угсарч, үйлдвэрлэж эхэлсэн.

J-800 маркийн автобус тун удахгүй үйлчилгээнд нэвтэрнэ. Үндэсний инженер техникчдийн оюун ухаанаар, хамгийн сүүлийн үеийн техник, технологийн дэвшилтийг ашиглан угсарч буй энэ автобус Монгол орны уур амьсгалын онцлогт тохирсон, агаарт ялгаруулах утаан дахь хорт бодисын агууламж харьцангуй бага байдаг” хэмээн ярьсан юм.

Монгол инженерүүдийн бүтээсэн автобус тун удахгүй үйлчилгээнд гарна