"Эрдэнэс Таван толгой" ХК ийн гүйцэтгэх захирлын үүрэг гүйцэтгэгч Б.Батбилэгээс Эрдэс баялгийн салбарын ил тод байдлын талаар тодруулга авлаа.

Уул уурхайн компаниуд ил тод байх нь зөв үү?

Ил тод байх нь зөв. Компанийн орлого юунд зарцуулагдаж байгаа нь ил тод болж, нийгмийн хариуцлага ч нэмэгдэх байх.

Танай компани ил тод байж чаддаг уу?

Манай компани шилэн дансны хуулиар бүх зүйлээ ил тод тайлагнадаг. Тиймээс ч ил тод байж чаддаг гэж хэлнэ. Мөн хөрөнгийн бирж дээр бүртгэлтэй учир хувьцаа эзэмшигчдийнхээ өмнө өндөр хариуцлага хүлээдэг. Харин хувийн компаниуд тэр бүр хөрөнгөө тайлагнах шаардлагагүй.

"Эрдэнэс Таван Толгой" ХК ил тод байснаар хөрөнгө оруулагчдыг хэр их татаж байна?

Төрийн өмчит компаниуд үйл ажиллагаандаа мөрддөг хэд хэдэн хуулийн зохицуулалт байдаг. "Шилэн дансны тухай хууль"-ийн дагуу өөрсдийн мөнгөний зарцуулалтаа тайлагнах, тендерийн хуулийн дагуу нээлттэй сонгон шалгаруулалт явуулах гэх мэт. Ил тод байх нь хөрөнгө оруулалтыг татахад нэмэр болж болох боловч үндсэн шалтгаан нь болдоггүй. Тиймээс нь "Эрдэнэс Таван Толгой" ХК-ийн хувьд ил тод байгаа нь хөрөнгө оруулагчдыг татаж байгаа гэж дүгнэхэд хэцүү.

"Эрдэс баялгийн ил тод байдлын тухай" хуулийн төсөлд нэмж, өөрчлөх санал юу байна?

Миний гадуур яригдаж буй зүйлсээс ойлгоход энэ санаачлагын гол зорилго нь илүү макро түвшинд мэдээллийг эх сурвалжтай зөв шийдвэр гаргахад ашиглах юм байна гэж ойлгож байна. Тэгэхдээ манайхан юмыг хэтрүүлэхдээ сайн, энэ санаачлагаа хувийн хэвшлийнхэнд дарамт болох зүйл битгий болоосой л гэж бодож байна. Зөв зүйтэй хэрэгжүүлэх тал дээрээ анхаарах нь чухал байх.

Энэ хууль батлагдвал танай компанийн үйл ажиллагаа, үр ашигтай байдалд ямар байдлаар нөлөөлөх бол гэсэн хүлээлттэй байна?

Эрдэнэс Таван Толгой ХК гэхээсээ илүү улсын түвшинд мэргэжлийн байгууллагууд боловсруулсан мэдээллийн эх сурвалжтай болно гэдэгт ач холбогдол нь байна гэж харж байна.