Эх орныхоо нэрийг дэлхий даяар дуурсгасан соёл, урлагийн алдартнуудыг төрүүлэн гаргадаг эрдмийн их уурхай - Монгол Улсын Соёл Урлагийн Их Сургуулийн 25, түүний бүрэлдэхүүнд багтдаг Дүрслэх дизайн урлагийн сургуулийн 70, Соёлын сургуулийн 50, Соёл урлаг судлалын хүрээлэнгийн 40 жилийн ой энэ өдрүүдэд тохиож байна.

Давхар ойн энэ жил СУИС-ын амжилтаас цухас дурдвал СУИС-ийн оюутнууд БНХАУ, БНСУ, ОХУ, Япон, Итали зэрэг оронд болсон хөгжим, бүжиг, кино, театрын оюутны наадамд амжилттай оролцож, багш нар болоод төгсөгчид П.Чайковский, М.Глинка, Плачидо Доминго, BBC, М.Магомаев зэрэг олон улсын А зэрэглэлийн уралдаан, Венец, Бээжингийн биенналь зэрэгт гайхам амжилт үзүүлэв.

Мөн их сургууль дан ганц сургалтыг эрхэм болгох бус эрдэм шинжилгээ судалгааны төв байх дэлхийн жишигт нийцүүлэх төр засгийн бодлогыг ажил хэрэг болгохын төлөө чармайн ажиллаж, чамгүй амжилтанд хүрсэн юм.

Тус сургууль их сургуулиудын нийгэмд чиглэсэн үйл ажиллагаа явуулах үүргийнхээ дагуу уламжлалт соёлоо залуу үе, гадаадынханд сурталчлах зорилготой “Соёлын наадам”-ыг долоон удаа зохиоход нийт 300000 орчим хүнийг хамарсан бол хотын соёлыг төлөвшүүлэх, оюутнуудын бүтээлийг нийтэд үзүүлэх, оюутнуудын нийгмийн өмнө хүлээх хариуцлагыг тодотгох зорилгоор 2013 оноос “Хотын гудамж-миний нутаг” оршин суугчдын өргөн зугаалга буюу гудамжны баярыг санаачлан таван удаа хийхэд нийт 200 мянга орчим хүн хамрагджээ.

/UBS/

Энэ мэт “Бид сайн сайханд дагуулна” гэсэн сургуулийнхаа урианд нийцсэн нийгэм, залуус руу хандсан олон ажлыг зохион байгуулсан нь нийгмийн талархал хүлээсээр байна.

СУИС-ийн 25 жилийн ой тохиож байна