Туркийн  “Birgün” сонины сэтгүүлч сониныхоо нэгдүгээр нүүрэнд “Эрдоган хулгайч, алуурчин” нэртэй нийтлэлийг хэвлэснийхээ төлөө эрүүгийн хариуцлагад татагдав.

Стамбулын шүүх тус сонины гурван сэтгүүлчийг, түүний дотор ерөнхий редактор Беркант Гюльтекинийг ерөнхийлөгчөө доромжилсны төлөө 11 сар 20 хоногийн хорих ялаар шийтгэсэн ч ялын гүйцэтгэлийг хойшлуулжээ.

Шүүх ялын гүйцэтгэлийг хойшлуулах шийдвэр гаргахдаа тэд дахин энэ мэтийн “гэмт үйлдэл” гаргахгүй байх нөхцөл нэг жилийн хугацаа өгсөн  байна. Өмгөөлөгчдийн үзэж буйгаар сонины гарчигнаас болж эрүүгийн хариуцлагад татах нь утгагүй.

Түүнчлэн өнгөрсөн пүрэв гарагт Туркийн ерөнхий сайд Давутоглуг твиттертээ доромжилж бичсэн хоёр сэтгүүлч тэнсэн харгалзах ял авчээ.

Мөн үүнээс өмнө “Cumhuriyet” сонины хоёр сэтгүүлч Туркийн тусгай албаныхан террористуудад нууцаар зэвсэг нийлүүлдэг хэргийг мөрдөж байгаад тагнуулын хэргээр баривчлагджээ.

Одоогийн байдлаар Туркийн шоронд 32 сэтгүүлч хоригдож байна.