Өнөө өглөө 08.30 цагаас Төрийн байгуулалтын байнгын хороо хуралдаж, Ерөнхий сайдыг огцруулах болон өөр гурван асуудлыг хэлэлцэх ёстой байсан ч  хуралдаж чадаагүй.

Энэ талаар Төрийн байгуулалтын байнгын хорооны дарга М.Бакейгээс тодрууллаа.

-Төрийн байгуулалтын байнгын хороо яагаад хуралдаж чадсангүй вэ?
-Байнгын хороонд харъяалагддаг АН болон ИЗНН-ын гишүүн, нийт есөн гишүүн бүрэн цугласан. Г.Уянга гишүүн тэргүүтэй Ерөнхий сайдыг огцруулах асуудлыг өргөн барьсан гишүүд төслөө танилцуулаагүй, дөрвөн цаг хүлээсэн.

-Төслөө танилцуулаагүйгээс хуралдаж чадсангүй юу, ирц бүрдээгүй учир хуралдсангүй юу?
-Төслөө орж ирж танилцуулаагүй учраас хуралдаж чадсангүй. Яагаад гэвэл Г.Уянга өөрөө ч байнгын хорооны гишүүн,  нөгөө талаар төсөл өргөн барьсан хүн.

-Өөрөө ороод ирсэн бол ирц бүрдчих байсан гэсэн үг үү?
-Ирц бүрдээгүй гэхээс илүү өөрсдөө асуудлаа өргөн барьчихаад хэлэлцье гэхээр хойш сууж байгаагаас  хуралдсангүй.

-13.30 цагаас хуралдахаар боллоо гэсэн ч бас хуралдсангүй?
-Одоо чуулган орох гэж байна. Түүний дараа манай хороо хуралдана.