Грек улс 10,3 сая хүн амтай, 13 мужтай. Муж болгон гал түймэртэй тэмцэх албатай.

Грекэд 2005 онд гарсан олон ойн түймрээс хойш гал түймэртэй тэмцэх сайн дурын албад олноор бий болжээ. Уг албад өнөөдөр мэргэжлийн гал сөнөөгчидтэй хамтран ажилладаг.

Гал түймэртэй тэмцэх сайн дурын албадын үйл ажиллагааг “Гал түймэртэй тэмцэх сайн дурын үйл ажиллагааны” тухай хуулиар зохицуулдаг. Уг хуулийн хүрээнд муж болгон гал түймрийн сайн дурын албадтай холбоотой журам баталдаг.

... Грекэд гал түймэртэй тэмцэх ажил алба нь төрийн болон хувийн гэсэн өмчийн хоёр хэлбэртэйгээс гадна сайн дурын албадын гүйцэтгэх үүрэг өндөр. Өнөөдөр эдгээр сайн дурын албадад 25 000 сайн дурынхан ажиллаж байна ...

Сайн дурынхан гал түймэр унтраагаад зогсохгүй мэргэжлийн гал сөнөөгчдийн нэгэн адил жижүүрлэх үүрэг хүлээдэг.

Грекийн Засгийн газар сайн дурынханд зориулж, дараах хөнгөлөлт, урамшуулал олгодог. Үүнд:

Тусгай ажиллагаанд оролцох зардлыг даана.
Мэргэжлийн гал сөнөөгчдийн цалингийн нормын дагуу ажилласан цагаар нь тооцож цалин олгоно.
Шагнал, одон тэмдэг олгох зэргээр сэтгэл зүйн дэм өгдөг
Үнэгүй хувцас, хоол хүнсээр хангадаг.
Хүссэн цагт нь амраана.
Төлбөргүй эрүүл мэндийн үзлэгт хамруулдаг.

Хөнгөлөлт, урамшууллын хэмжээг орон нутгийн захиргаа тодорхойлно. Харамсалтай нь сүүлийн жилүүдэд эдийн засгийн хямралаас үүдэн, зарим муж гал сөнөөгчдөд өгөх хөнгөлөлт, урамшууллыг хасчээ.

Гал түймэртэй тэмцэх сайн дурын албанд 18-60 насны хүмүүс ажиллах бөгөөд эрүүл мэндийн үзлэгийн дүнгээс хамаараад гал түймрийн үед гүйцэтгэх үүрэг нь харилцан адилгүй.

... Сайн дурынхны бэлтгэгдсэн байдал мэргэжлийн гал сөнөөгчдөөс дутахгүй. Сайн дурын болон мэргэжлийн гал сөнөөгчдыг сургахад нэг жилд 300 цагийн хичээл заадаг ...

Эрүүл мэндийн үзлэг, тестийн шалгалтын шаардлага өндөр учраас сайн дурын гал сөнөөгчид мэргэжлийн түвшинд ажиллаж чаддаг. Шалгалтанд тэнцсэн хүмүүсийг жижүүрийн хуваарьт оруулж, ажлын газрынх нь удирдлагатай хэзээ жижүүрээр ажиллуулж болох талаар тохиролцдог.

Сайн дурын албанд эрэгтэйчүүд төдийгүй эмэгтэйчүүд ч ажилладаг байна. Түймрийн улиралд сайн дурынхан тусгай тоноглолтой машинтай эргүүл хийдэг.

Хамгийн сайн бэлтгэгдсэн гал сөнөөгчид олон улсын хэмжээний түймэр унтраах ажиллагаанд оролцдог. Жишээ нь 2011 онд Албанид гарсан ойн түймрийн үеэр Грекээс 24 сайн дурын гал сөнөөгч ажиллажээ. Тэр жилдээ Грек, Испани, Франц, Итали зэрэг улсын мэргэжлийн болон сайн дурын гал түймэртэй тэмцэх албад томоохон түймрийн үед харилцан туслалцах гэрээ байгуулжээ.

Олон улсын туршлагаас харахад гал түймэртэй тэмцэх сайн дурын албадыг амжилттай ажиллуулахын тулд дараах эрх зүйн орчинг бүрдүүлэх хэрэгтэй бөгөөд бидэнд суралцах зүйл байна. Үүнд:

Сайн дурынхны үйл ажиллагааг зохицуулах бие даасан хууль гаргах
Хөнгөлөлт, урамшууллын системтэй уяж өгөх
Гал унтраах, галын аюулаас урьдчилан сэргийлэх, авран хамгаалах чиглэлийн сургалт зохион байгуулах

Грек улсын гал түймэртэй тэмцэх сайн дурын алба