Халуун зунаар сааль сүүгээ орхиод явчихдаг хачин хүн юмаа гэдэг шиг сонгууль хэзээ модгүй болох гэж байхад Засгийн газрыг огцруулахаар үүл манан хөөрөөд эхэлчихлээ. Бүр дараагийн Ерөнхий сайдын эрэл сурал, нэр ус дуулдаж байна. Эзэн нь ховхроогүй байгаа суудлын төлөө өөрийгөө тодорхойлогчид ч олширохыг яана. Тэдний нэг нь УИХ-ын гишүүн Ц.Баярсайхан. Түүний нэр анх удаа Ерөнхий сайдад яригдаж байгаа юм биш. 1990-ээд оны төгсгөлөөр АН Засаг барьж байх үед тухайн үеийн Ерөнхийлөгч Н.Багабанди Ц.Баярсайханыг ноён нуруутай, Ерөнхий сайдаар ажиллах боломжтой хүний нэгээр нэрлэж байлаа. Гэхдээ үгнээс хэтрээгүй.

Өнөөдрийг хүртэл улс төрд байгаа эсэх нь бүрхэг, олны нүдэнд өртөөд байдаггүй, зураглаачийн дуран харахаараа өндөлзөөд байдаггүй л нэгэн. Товчхондоо, гай ч үгүй, гавьяа ч үгүй нэгэн гэхэд хилсдэхгүй. Зарим нэг нь түүнийг улс төрд нэр цэвэр цөөн хүний нэг гэлцдэг л юм. Үнэхээр ч түүнтэй холбоотой элдэв сөрөг дүр зураг өнөөдрийг хүртэл гарч байсангүй. Өмнөговийнхны төлөөлөл болж УИХ-д гурвантаа сонгогдсон нэгэн. Аливаад буурь суурьтай ханддаг, үг уралдуулж, дүр эсгээд байдаггүй гээд сайн тал ихтэй. Гэхдээ сайд болох шалтгаантай нэгэн бас биш.

Зүй нь “Шонхор”-ууд “Алтангадас”-ынхны зөрчилдөөн дунд хавчуулагдан тохиролцооны “тоглоом” болох шахаж яваа гэхэд тэгсдүүлсэн болохгүй л болов уу. Хэрэв “Алтангадас”-ынхан намын даргатайгаа учраа олохгүй бол Зэ түүнийг түлхүүрдэж, нэр нь сонсогдож байснаас биш үйлдэгдэж байгаагүй үйл явдал биелэлээ олно. Харин АН-ын хоёр фракцийн удирдагчид тохиролцож, эв зүйгээ олбол тэр өнөөдрийнхөөрөө л үлдэнэ. Ерөнхий сайдад нэр нь яригдаж байсан гэх өмнөх шигээ дурдатгалаас өөр зүйлгүйгээр.

Мань эр намтрыг сөхвөл ажлын гараагаа Өмнөговь аймгийн АДХ-ын гүйцэтгэх захиргааны мэргэжилтнээс эхэлж, аймгийн Засаг даргаар ажиллаж улмаар УИХ-д гурван удаа сонгогдож, Эдийн засгийн байнгын хороог толгойлж байв. Түүнчлэн 2004-2006 онд Хөдөлмөр, нийгмийн хамгааллын сайд, Н.Алтанхуягийн үед Барилга хот байгуулалтын сайдаар ажиллаж байсан.