Өчигдөр МАН-ын дарга М.Энхболд мэдээлэл хийлээ. Тус намын удирдлага, төлөөлөгчид ОХУ-ын Единая Россия намын урилгаар энэ сарын 25-27-ны өдрүүдэд ОХУ-д айлчлал хийсэн байна. Энэ үеэр тэд ОХУ-ын Холбоон ы зөвлөлийн тэргүүн Валентина Матвиенко, Холбооны Зөвлөлийн дээд дарга Омаханов нартай уулзжээ. М.Энхболд “Холбооны зөвлөлийн хурлаар хэлэлцэх 

ёстой байсан ч хугацаа алдаж, хойшлоод байсан Монголросцветмет нэгдлийн өрийн асуудлыг хэлэлцэх асуудлын дараалалд оруулах, мөн Төрийн Думын гишүүдийн гаргасан шийдвэрийг батламжлахыг бид хүссэн юм. Хатагтай Матвиенко бидний хүсэлтийг хүлээн авч, энэ сарын 27-ны өдөр буюу Холбооны зөвлөлийн хаврын чуулганы нээлтэд Монголын өрийн асуудлыг хэлэлцлээ. 

Чуулганы хуралдаанаар 166 гишүүнээс 158 гишүүн дэмжиж, Монгол Улсаас ОХУ-ын өмнө хүлээсэн 174.5 сая ам.долларын өрийн 97.5 хувийг нь тэглэх шийдвэр гарсан” гэв. Энэ шийдвэрийн үр дүнд “Монголросцветмет” нэгдлийн ОХУ-аас зээлсэн 174.5 ам.долларын 3.8 саяыг нь 30 хоногийн дотор төлөх ёстой, үлдсэн нь хүчингүй болж байна гэсэн үг ажээ.